अजित पवार यांच्या विमानाच्या ब्लॅक बॉक्सबद्दल रोहित पवार यांचा थेट दावा, म्हणाले, तो…

28 जानेवारी 2026 रोजी उपमुख्यमंत्री अजित पवार मुंबईहून बारामतीकडे निघाले होते. यावेळी बारामती विमानतळाच्या अगदी जवळ त्यांच्या विमानाचा भीषण अपघात झाला. अजित पवार या विमान अपघातात गंभीर जखमी झाल्याची माहिती सुरूवातीला होती. मात्र, त्यानंतर अजित पवार यांचे विमान अपघातात निधन झाल्याचे स्पष्ट झाले. विमान अपघातादरम्यानचे काही व्हिडीओही पुढे आली. विमान जमिनीवर कोसळल्यानंतर तीन ते चार मोठे स्फोट झाले. भीषण आग विमानाला लागली. अजित पवार यांच्या विमान अपघातानंतर चार दिवसांनी सुनेत्रा पवार यांनी उपमुख्यमंत्रिपदाची शपथ घेतली. मात्र, यादरम्यान शरद पवार यांनी मोठे भाष्य करत म्हटले की, सुनेत्रा पवार यांच्या शपथविधीबद्दल मला कोणतीही कल्पना नाही. यादरम्यानच आमदार रोहित पवार अजित पवार यांच्या विमान अपघातानंतर मोठे संशय व्यक्त करताना दिसत आहेत.

नुकताच रोहित पवार यांनी म्हटले की, रिपोर्टमध्ये ब्लॅक बॉक्सचा फोटो यायला हवा होता. पण त्यात त्यांनी दिला नाही. अहमदाबादचा स्फोट मोठा होता. त्यातील ब्लॅक बॉक्स सापडला. त्यातून डेटा निघाला. पण डीजीसीएने तो पूर्णपणे दिला नाही. त्यालाही मोठी कंट्रोवर्सी आहे. तो विषय नंतर घेऊ. यूएसमध्ये लेअरजेट पडलं होतं. त्याचा ब्लॅक बॉक्स सापडला. त्यातील सर्व माहिती रिकव्हरी करण्यात आली.

दुबईत तेजस विमान कोसळलं होतं. आपला पायलट शहीद झाला. पण त्यातील ब्लॅक बॉक्सचा डेटा घेतला आहे. रामचंद्र नावाचे डिरेक्टर आहेत. त्यांनीच अजितदादांच्या ब्लॅक बॉक्सवर सही केली. ब्लॅक बॉक्स ओके आहे म्हणाले. 2023 ला ते असिस्टंट डायरेक्टर होते. आता त्यांची पदोन्नती झाली.

ब्लॅक बॉक्सवर फक्त राख बसली आहे. ते डॅमेज झालं नाही. राख बसली म्हणून ब्लॅक बॉक्स डॅमेज झाला असे म्हणत असतील तर ते हास्यास्पद आहे. या ब्लॅक बॉक्सच्या आत एक चीप असते. हा फोटो रिपोर्टमध्ये यायला हवा होता. पण दुर्देवाने आला नाही, असेही रोहित पवार यांनी म्हटले. रोहित पवार यांनी मोठा दावा करत म्हटले की, ब्लॅक बॉक्स डॅमेज झालेला नाही.