Santosh Bangar: त्या मंत्र्यांना घरी पाठवा, संतोष बांगर यांचा पक्षालाच घरचा आहेर, खासदार श्रीकांत शिंदेसमोरच कडाडले बांगर

Santosh Bangar Warns Minister: ऑपरेशन टायगरची चर्चा मागे सरते ना सरते तोच शिवसेनेतील अंतर्गत खदखद बाहेर आली आहे. शिंदे सेनेतील काही नेते मंत्र्यांवर फारच नाराज असल्याचे समोर आले आहे. संतोष बांगर हे शिंदे सेनेत दाखल झाल्यापासून त्यांनी काही मुद्यांवर आक्रमक पवित्रा दाखवला आहे. बुलढाण्याचे आमदार संजय गायकवाड आणि कळमनुरीचे आमदार संतोष बांगर यांच्या आक्रमक शैलीने आणि बेताल वक्तव्याने मागील वर्ष गाजले होते. हे दोन्ही नेते राष्ट्रीय स्तरावर गाजले होते. आता संतोष बांगर यांनी राज्य सरकारलाचा धारेवर धरले आहे. त्यांनी महायुती सरकारलाच घरचा आहेर दिला आहे.

मराठवाड्यात धुसफूस

नांदेड येथे एकनाथ शिंदे यांच्या शिवसेनेची आढावा बैठक होती. ही बैठक अनेक कारणांनी गाजली. सध्या मराठवाड्यातील काही ठिकाणी स्थानिक नेते आणि कार्यकर्त्यांमध्ये धुसफूस सुरू असल्याचे दिसून येते. धाराशिवमध्ये शिवसेनेतील उभी दुफळी ही गेल्या काही दिवसांपासून चर्चेचा विषय ठरली आहे. तर इतर जिल्ह्यातीलही नेत्यांमधील विसंवाद आणि कार्यकर्त्यांची नाराजी उघड झाली आहे. जाहिररीत्या ही नाराजी समोर येत आहे. यावर पक्षाने वेळीच काही धोरण ठरवले नाही तर अंतर्गत विसंवाद वाढून दुफळीने पक्षाला फटका बसण्याची भीती कार्यकर्ते व्यक्त करत आहेत. सत्तेत असूनही निधी वाटपातील अन्याय, अनेक ठिकाणी कामं न मिळण्याची तक्रार, तर कामे करण्यासाठी वारंवार तगादा लावावा लागत असल्याची ओरड कार्यकर्ते करत आहेत.

संतोष बांगर कडाडले

नांदेड येथील शिंदे सेनेच्या आढावा बैठकीत आमदार संतोष बांगर यांनी कार्यकर्त्यांच्या मनातील भावना पक्ष श्रेष्ठींसमोर आणली. त्यांनी यावेळी आक्रमक पवित्रा घेतला. खासदार श्रीकांत शिंदे, उद्योगमंत्री उदय सामंत आणि पाणीपुरवठा मंत्री गुलाबराव पाटील यांच्यासमोरच त्यांनी तक्रारींचा पाढा वाचला. त्यांच्या या आक्रमकपणामुळे काही काळ बैठकीचं वातावरण तापलं. गंभीर झालं. कार्यकर्त्यांनी त्यांना पाठिंबा दिला. मनातील खदखद त्यांनी बाहेर काढली. मंत्र्यांच्या डोक्यात हवा गेली आहे. डोक्यात हवा गेलेल्या मंत्र्यांना अगोदर घरी बसवा असा घरचा आहेर आमदार संतोष बांगर यांनी दिला.