Eknath Shinde : आज एकनाथ शिंदेंचा साताऱ्यात पावर शो, पण तो आमदार नाही दिसणार, बॅनरवरुन पण गायब, पक्षासोबत बिनसलं

आज उपमुख्यमंत्री एकनाथ शिंदे साताऱ्यात येत आहेत. सातारा हा एकनाथ शिंदे यांचा गृहजिल्हा आहे. एकनाथ शिंदे हे साताऱ्यात अनेकदा दरेगावी मुक्कामी येत असतात. जिल्हा परिषद अध्यक्ष, उपाध्यक्ष निवडीच्या राड्यानंतर एकनाथ शिंदे प्रथमच साताऱ्यात येत आहेत. त्यांच्या या दौऱ्याच्या निमित्ताने शिवसेनेकडून शक्ती प्रदर्शन होणार आहे. उपमुख्यमंत्री एकनाथ शिंदे यांची साताऱ्यात सभा होणार आहे. दुपारी त्यांचं अंगापूरला आगमन होईल. त्यानंतर सातारा गांधी मैदानावर सभा होणार आहे. ठिकठिकाणी स्वागत कमानी उभारण्यात आल्या आहेत. सातारा जिल्हापरिषद अध्यक्ष, उपाध्यक्ष निवडी दरम्यान राडा झाला होता. त्यानंतर प्रथमच सभा होत आहे.

कोरेगाव, खटाव तालुका जिल्ह्यातील अनेक कार्यकर्त्यांचा पक्ष प्रवेश होणार आहे. एकनाथ शिंदे यांच्या उपस्थितीत विशेष बैठकीचं आयोजन करण्यात आलं आहे. एकनाथ शिंदे यांच्या स्वागतासाठी अनके फलक उभारण्यात आले आहेत. त्या फलकांमधून आमदार महेश शिंदे यांचा फोटो गायब आहे. जिल्हा परिषद अध्यक्ष, उपाध्यक्ष निवडी दरम्यान महेश शिंदे यांनी भाजपला साथ दिली होती. त्यांच्या मर्जीतले दोन सदस्य भाजपसोबत गेले होते. तेव्हापासून शिवसेनेत त्यांच्याबद्दल नाराजी आहे. आज एकनाथ शिंदे यांच्या दौऱ्याच्या निमित्ताने पुन्हा एकदा ही नाराजी दिसून आली आहे.

आम्हाला बाजूला ठेवलं आहे

स्वत: महेश शिंदे टीव्ही 9 मराठीशी बोलले. “आमच्याबाबतीत असं झालं की, जिल्ह्यात ते राष्ट्रवादी बरोबर एकत्र होते. परंतु माझ्याइथे मी भाजप बरोबर एकत्र होतो. मी क्रमप्राप्त भाजप बरोबर गेलो. त्यामुळे एखाद्यावेळेला आमच्या सदस्यांना, आम्हाला बाजूला ठेवलं आहे” तुम्ही आज सभेला जाणार का? त्यावर महेश शिंदे यांनी नाही असं उत्तर दिलं. आपल्या तालुक्यातले काही पक्ष प्रवेश होत आहे. “चांगली गोष्ट आहे. वाईट आहे का?. माझ्या पक्षात, माझ्या कार्यकर्त्यांचे प्रवेश आनंदाची गोष्ट नाही का?” असं महेश शिंदे म्हणाले.

त्याची मला सवय आहे

“बेसिकली तुम्ही लक्षात घ्या. महाबळेश्वरचा इतका मोठा पर्यटन महोत्सव होता, त्याला मला बोलावलं नव्हतं. पाटणमध्ये, कराडमध्ये साहेबांनी कधी बोलावलं नाही. ही पहिलीच वेळ नाहीय. हे पहिल्या दिवसापासून आहे. त्याची मला सवय आहे. मला काही वाटत नाही” असं महेश शिंदे म्हणाले.