Thane Swine Flu : स्वाईन फ्लूची चाचणी महापालिकेच्या सर्व आरोग्य केंद्रांवर विनामूल्य होणार, ठाणे महापालिका आयुक्तांची घोषणा
जुलैमधील पावसाच्या पार्श्वभूमीवर ठाण्यात स्वाईन फ्लूचा धोका वाढत आहे. महिनाभरात स्वाईन फ्लूचे 20 रुग्ण आढळले. त्यापैकी 15 जण बरे झाले आहेत. तर 2 जणांचे निधन झाले.
ठाणे : मंकी पॉक्स पाठोपाठ आता स्वाईन फ्ल्यू (Swine Flu) ने डोके वर काढले असून यामुळे प्रशासनाची चिंता आता वाढली आहे. दररोज स्वाईन फ्ल्यू च्या रुग्णांमध्ये वाढ होत आहे. त्यात ठाण्यात सोमवारी स्वाईन फ्ल्यू मुळे एकाच दिवशी दोन महिलांचा मृ्त्यू झाल्याने महापालिकेसह राज्याच्या आरोग्य विभागाची झोप उडाली आहे. यामुळे महापालिका प्रशासन अलर्ट (Alert) झाले असून स्वाईन फ्ल्यू रोखण्यासाठी विशेष उपाययोजना राबवत आहे. स्वाईन फ्लूच्या वाढत्या संसर्गाच्या पार्श्वभूमीवर ठाणे महापालिकेने स्वाईन फ्लू ची चाचणी (Test) महापालिकेच्या सर्व आरोग्य केंद्रांवर विनामूल्य करण्याचा निर्णय घेतला आहे. या चाचणीसाठी संबंधित डॉक्टरांची लेखी शिफारस लागेल, अशी माहिती ठाणे महापालिका आयुक्त तथा प्रशासक डॉ. विपिन शर्मा यांनी दिली आहे.
ठाण्यात महिनाभरात स्वाईन फ्ल्यू चे 20 रुग्ण
जुलैमधील पावसाच्या पार्श्वभूमीवर ठाण्यात स्वाईन फ्लूचा धोका वाढत आहे. महिनाभरात स्वाईन फ्लूचे 20 रुग्ण आढळले. त्यापैकी 15 जण बरे झाले आहेत. तर 2 जणांचे निधन झाले. आतापर्यंत रुग्ण सापडलेल्या परिसरातील हजारो घरांचे सर्वेक्षण आरोग्य विभागामार्फत करण्यात आले. त्यात नवीन रुग्ण आढलेले नाहीत. स्वाईन फ्ल्यू सोबतच डेंग्यूचे रुग्णही वाढत आहेत.
स्वाईन फ्ल्यू ची लक्षणे आणि काळजी
ताप, कोरडा खोकला, घशात खवखव, भूक मंदावणे, डोके दुखणे ही स्वाईन फ्लू ची लक्षणे आहे. नागरिकांना ही लक्षणे जाणवल्यास तात्काळ वैद्यकीय सल्ला घ्यावा, असे आवाहन महापालिकेने केले आहे. तसेच, कोविड काळाप्रमाणेच मास्क वापरणे, गर्दीत जाणे टाळणे ही पथ्ये पाळावीत, असेही आवाहन महापालिकेने केले आहे. (Swine flu test will be free at all health centers of the thane municipality)
