लग्नासाठी बँकांनी सुरु केले कर्ज, एक कोटीपर्यंत लोन अन् व्याज मात्र…
marriage loan interest | भारतात लग्नाचे मार्केट आठ लाख कोटी असल्याचे केपीएमजीने म्हटले आहे. यावर्षी फेब्रुवारीपर्यंत देशात २५ लाख लग्न होण्याचा अंदाज आहे. या लग्नांसाठी बँका आता कर्ज देऊ लागल्या आहे. त्यात एसबीआयसारख्या बँकेचाही समावेश आहे.
नवी दिल्ली, दि. 7 जानेवारी 2024 | ‘घर पाहावे बांधून आणि लग्न पाहावे करून’ अशी आपल्याकडे एक म्हण आहे. आयुष्यात या दोन गोष्टी जवळपास सर्वच जणांना कराव्या लागतात. मुलगा, मुलगी वयात आले की त्यांचे दोनाचे चार हात करणे हे प्रत्येक आई-वडिलांचे कर्तव्य असते. त्याचवेळी घर चांगले बांधण्याचे त्यांचे स्वप्न असते. घरासाठी होमलोन सहज मिळू लागले आहे. परंतु आता लग्नासाठी यापूर्वी पैशांची जुळवाजुळव करताना अनेक अडचणी येत होत्या. आता लग्नासाठी कर्ज बँकांनी सुरु केले आहे. भारतीय रिझर्व्ह बँकेने पसर्नल लोन अनसिक्योर्ड म्हटले आहे. त्यानंतर अनेक बँकांनी लग्नासाठी एक कोटीपर्यंत कर्ज देणे सुरु केले आहे. लग्नासाठी कर्ज घेणारे ग्राहक वाढत आहेत.
काय आहेत अटी
लग्नासाठी कर्ज घेण्यासाठी बँकांनी काही अटी ठेवल्या आहेत. लग्नासाठी कर्ज घेताना वय २१ वर्ष पूर्ण असले पाहिजे. हे कर्ज फिटताना वय ६० वर्षांपेक्षा जास्त नको. त्यासाठी मासिक पगार कमीत कमी पंधरा हजार हवा. क्रेडीट स्कोर ७५० पेक्षा जास्त असला पाहिजे. हे कर्ज घेण्यासाठी आधारचा पुरावा लागणार आहे. घराचा पुरावा म्हणून वीज बिल, टेलिफोन बिल, आधार, मतदान कार्ड लागतो. मागील तीन महिन्यांचे बँक स्टेटमेंट द्यावे लागते. नोकरीचा पुरावा आणि पगार पत्रक दिल्यास कर्ज मिळू शकते.
कोणत्या बँका देताय कर्ज
लग्नासाठी एक कोटीपर्यंत कर्ज काही बँका देत आहे. एचडीएफसी बँक, एक्सिस बँक, आयसीआयसीआय बँक, बजाज फिनसर्व, टाटा कॅपिटल, एसबीआय आणि लँडिंगकार्ट या बँकांकडून कर्ज दिले जात आहे. त्यासाठी व्याजदार १०.४९ टक्क्यांपासून ३६ टक्क्यांपर्यंत आहे. हा व्याजदर सिबिल स्कोरवर अवलंबून आहे. सिबिल स्कोर चांगला असले तर व्याज कमी लागते. एक ते सात वर्ष कर्ज फेडण्याचा कालावधी दिला आहे. भारतात लग्नाचे मार्केट आठ लाख कोटी असल्याचे केपीएमजीने म्हटले आहे. यावर्षी फेब्रुवारीपर्यंत देशात २५ लाख लग्न होण्याचा अंदाज आहे.
