Maharashtra News LIVE : CJP कडून आज ‘लहरा दो तिरंगा’ आंदोलन, दिल्लीत अभूतपूर्व सुरक्षा व्यवस्था

मालेगावच्या डोंगराळे बालिका अत्याचार-हत्या प्रकरणाचा आज फैसला होणार आहे.  चार वर्षीय चिमुरडीवरील अत्याचार आणि हत्या प्रकरणाचा निकाल लागणार आहे.  मालेगाव अपर जिल्हा व सत्र न्यायालयात आज निर्णय होणार आहे.  आरोपीला फाशी की जन्मठेप? शिक्षेकडे संपूर्ण राज्याचे लक्ष लागलं आहे.  १६ नोव्हेंबर २०२५ रोजी धक्कादायक घटना घडली होती.

आमदार निलेश राणे यांच्यावर सोशल मिडियावर आक्षेपार्ह टिप्पणी करणाऱ्या एकाला अटक करण्यात आलीय.  सचिन धुरी असे अटक करण्यात आलेल्या ठाकरे गटाच्या कार्यकर्त्याचे नाव आहे. ते कुडाळ तालुक्यातील साळगाव येथील ठाकरे सेनेचे शाखाप्रमुख आहेत. एका डिजिटल वृत्तवाहिनीच्या सोशल मीडिया पेजवर आमदार निलेश राणे यांचे वृत्त प्रसारित करण्यात आले होते. या बातमीच्या कमेंट सेक्शनमध्ये आपल्या अकाऊंटवरून आक्षेपार्ह कमेंट करण्यात आली होती.

जळगावमध्ये महापालिकेच्या कचरा संकलन करणाऱ्या कामगारांचे दुसऱ्या दिवशीही कामबंद आंदोलन सुरू आहे. कामगारांच्या संपामुळे कचरा संकलन करणाऱ्यांचं घंटागाड्या बंद आंदोलन सुरू आहे. कामगारांच्या आंदोलनामुळे शहरात ठिकठिकाणी ३०० टन हून अधिक कचरा पडून असल्याची माहिती आहे. पगार रखडल्याने कचरा संकलन करणाऱ्या कर्मचाऱ्यांनी संप पुकारला असून दुसऱ्या दिवशीही कामबंद आहे. ऐन सन उत्सवात घंटागाड्यांवरील कामगारांच्या संपामुळे नागरिकांची घरात साचल्याने गैरसोय होत आहे.

नाशिकच्या सप्तशृंगी गडावर व्हीआयपींच्या वाहनांना प्रवेश बंदी घालण्यात आली आहे. भाविकांची होणारी गैर सोय लक्षात घेता जिल्हाधिकाऱ्यांनी आदेश दिले. व्हीआयपींना नांदुरी हुन एसटीच्या वातानुकूलित बसणे प्रवास करावा लागणार आहे. शनिवारपासून कोणत्याही व्हीआयपीच्या वाहनाला थेट गडावर प्रवेश मिळणार नाही. भाविकांना रांगेत ताटकळत राहावे लागू नये आणि भेळवीमुळे होणारी गर्दी टाळावी यासाठी सूचना देण्यात आल्या आहेत.

आपल्या मूळ तुरंबव गावात शारदा देवी मंदिरात जखडी नृत्यात भास्कर जाधव सामील झाले होते. नवरात्र उत्सवात पारंपरिक वेषभूशेत ग्रामस्थ देवीच्या गाभाऱ्यात जाखाडी त सहभागी होतात. दरवर्षी भास्कर जाधव यात सहभागी होत असतात.

अहिल्यानगरच्या पाथर्डी तालुक्यातील भगवानगड परिसरातील शेतकरी आणि स्वाभिमानी शेतकरी संघटनेच्या वतीने आंदोलन करण्यात आले. कल्याण–निर्मल राष्ट्रीय महामार्गावरील तुळजवाडी फाटा येथे बैलगाड्या आणि जनावरांसह रास्ता रोको करण्यात आला. जनावरांसाठी चारा, पिण्याचे पाणी आणि शेतकऱ्यांना हाताला काम मिळावे, अशा प्रमुख मागण्या यावेळी आंदोलकांनी केल्या आहे. दुष्काळी परिस्थितीमुळे शेतकरी आणि पशुधनासमोर निर्माण झालेल्या समस्यांकडे शासनाचे लक्ष वेधण्यात आले. या आंदोलनामुळे महामार्गावरील वाहतुकीवर परिणाम झाला. शेतकऱ्यांच्या मागण्यांवर शासनाने तातडीने उपाययोजना कराव्यात, अशी मागणी यावेळी करण्यात आली.

सिंधुदुर्ग जिल्ह्यातील आंबा व काजू पिकांचे मोठे नुकसान झाले होते. यामुळे बागायतदारांना मोठा आर्थिक फटका बसला. याबाबत शासन स्तरावर नुकसानीचे पंचनामे करण्यात आले. यातून काही बागायतदारांना नुकसानीपोटी मदत जाहीर करण्यात आली. ही मदत तुटपुंजी असल्याचे बागायतदार सांगतात. तर काही बागायतदारांना मिळाली असली तरी अजूनही काही बागायतदार प्रतीक्षेत असल्याचे दिसून येत आहे. आकडेवारीनुसार, सिंधुदुर्ग जिल्ह्यातील २९ हजार ३०८ बागायतदारांना ६४ कोटी ५३ लाख ०४ हजार ८४६ रुपये नुकसान भरपाई मिळाली आहे. तर २ हजार २१२ लाभार्थी शेतकऱ्यांची भरपाई मिळणे प्रलंबित आहे.

ट्रिगर १ अंतर्गत भंडारा जिल्ह्यातील ५ तालुक्यांतील ६९३ गावांचा यामध्ये समावेश असून ३० हजार ४०१.८० हेक्टर क्षेत्रावरील पिकांचे ३३ टक्क्यांपेक्षा जास्त नुकसान झाले आहे. सध्या ३३३ गावांमधील ५३ हजार १२१ हेक्टरचे दुष्काळी पंचनामे पूर्ण झाले असून, यात ८३ हजार ९३८ खातेदारांची नोंद करण्यात आली आहे. जिल्हाधिकारी सावन कुमार यांनी पीकनुकसानीचे पंचनामे तातडीने पूर्ण करण्याचे कडक निर्देश संबंधित यंत्रणेला दिले आहेत.

नवरात्रोत्सव सुरू झाला की सर्वत्र भक्तिमय वातावरण पाहायला मिळतं. देवीच्या पूजेसाठी, मंदिरांच्या सजावटीसाठी आणि घराघरांत होणाऱ्या घटस्थापनेसाठी झेंडूच्या फुलांना विशेष महत्त्व असतं. त्यामुळे नवरात्रोत्सवाच्या काळात झेंडूच्या फुलांना मोठी मागणी असते. याच पार्श्वभूमीवर शेतांमध्ये झेंडूची फुलं बहरली असून, शेतकऱ्यांनीही मोठ्या आशेने झेंडूचं पीक घेतलं आहे. मात्र, सध्या झेंडूच्या फुलांना प्रतिकिलो २५ ते ३० रुपयांचा बाजारभाव मिळत असल्याने शेतकरी अपेक्षित दराच्या प्रतीक्षेत आहेत. दसऱ्याच्या सणाला फुलांची मागणी वाढेल आणि बाजारभावात सुधारणा होईल, अशी आशा शेतकऱ्यांना आहे.

मुख्य निवडणूक आयुक्त ज्ञानेश कुमार यांच्या राजीनाम्यासाठी आणि सौरव दास, आशुतोष रांका या नेत्यांची धरपकड केल्याने कॉकरोच जनता पार्टी आज दिल्लीत लहरा दो तिरंगा मोर्चा काढणार आहे. दरम्यान मुंबईतील आझाद मैदानातही सीजेपीचे आंदोलन होणार आहे. त्यासाठी दिल्लीत कडेकोट बंदोबस्त करण्यात आला आहे. आजच्या आंदोलनात कोणतीही गडबड होऊ नये यासाठी सुरक्षा यंत्रणा डोळ्यात तेल घालून तैनात आहेत.