एनडीएने सरकार स्थापनेचा केला दावा, या पक्षांकडून मोदींना पाठिंब्याचे पत्र राष्ट्रपतींकडे सादर

लोकसभा निवडणुकीत एनडीएला बहुमत मिळाल्यानंतर आता एनडीएने सरकार स्थापनेचा दावा केला आहे. एनडीएने राष्ट्रपतींना पाठिंब्याचे पत्र सादर केले आहे. त्यामुळे आता 9 जून रोजी नरेंद्र मोदी यांचा शपथविधी होणार असून त्याची तयारी सुरू झाली आहे. नुकत्याच पार पडलेल्या लोकसभा निवडणुकीत 543 सदस्यांच्या लोकसभेत भाजपला 240 जागा मिळाल्या आहेत तर एनडीएला 293 जागा मिळाल्या आहेत. एनडीएकडे बहुमताचा आकडा असल्याने त्यांनी आज सरकार स्थापनेचा दावा केलाय.

भारतीय जनता पक्षाच्या नेतृत्वात एनडीएचा नेता म्हणून तिसऱ्यांदा पंतप्रधानपदी निवड मोदी यांनी निवड करण्यात आली आहे. मोदी म्हणाले की, पुढील काळात त्यांचे सरकार सुशासन, विकास, जीवनमान आणि किमान गुणवत्ता यावर लक्ष केंद्रित करणार आहे. येत्या 10 वर्षात सर्वसामान्य नागरिकांच्या जीवनावर लक्ष केंद्रित केले जाईल. परस्पर विश्वास हा या आघाडीचा गाभा असून सर्व पंथ समभाव या तत्त्वाशी ते कटिबद्ध असल्याचे त्यांनी सांगितले.

एनडीएला विजय कसा पचवायचा हे चांगले ठाऊक आहे, असा दावा करून मोदी म्हणाले, “युतीच्या इतिहासातील संख्येच्या दृष्टीने पाहिल्यास हे सर्वात मजबूत आघाडीचे सरकार आहे.” विरोधी पक्षांवर हल्लाबोल करताना पंतप्रधान म्हणाले की, “आम्ही कधीही हरलो नाही. 4 जूननंतरचे आमचे आचरण दाखवते की आम्हाला विजय कसा पचवायचा हे माहित आहे.”

आज झालेल्या एनडीएच्या बैठकीत तेलुगु देसम पक्षाचे (टीडीपी) एन चंद्राबाबू नायडू, जनता दल (युनायटेड)चे नितीश कुमार, शिवसेनेचे एकनाथ शिंदे, लोक जनशक्ती पक्षाचे (रामविलास) चिराग पासवान, जनता दल (एस)चे एचडी कुमारस्वामी, राष्ट्रवादी काँग्रेसचे अजित पवार, अपना दल (एस) च्या अनुप्रिया पटेल, जनसेना पक्षाचे पवन कल्याण आणि भाजपचे नवनिर्वाचित सदस्य आणि एनडीएच्या इतर मित्रपक्षांनी सहभाग घेतला.

पंतप्रधान नरेंद्र मोदी यांचा शपथविधी ९ जून रोजी संध्याकाळी ६.३० वाजता राष्ट्रपती भवनाच्या प्रांगणात होणार आहे. या शपथविधीसाठी अनेक देशाचे प्रमुख देखील उपस्थित राहणार असल्याची माहिती मिळत आहे.

&

पंतप्रधान नरेंद्र मोदी यांनी आज माजी उपपंतप्रधान लालकृष्ण आडवाणी यांची भेट घेतली आहे. तसेच त्यांनी भाजपचे ज्येष्ठ नेते मुरली मनोहर जोशी यांची देखील भेट घेतली.