पैलवानांच्या आंदोलनाला रामदेवबाबांचं समर्थन; थेट केली बृजभूषण सिंह यांच्या अटकेची मागणी

नवी दिल्ली : भारतीय कुस्ती संघाचे अध्यक्ष आणि भाजपचे खासदार बृजभूषण शरण सिंह यांच्या विरोधात दिल्लीत आंदोलन केलं जात आहे. विनेश फोगाट, बजरंग पुनिया, साक्षी मलिक यांच्यासह अन्य पैलवान दिल्लीतील जंतर-मंतर मैदानावर आंदोलन करत आहेत. याला बाबा रामदेव यांनी पाठिंबा दिला आहे. इतकंच नाही तर आंदोलकांच्या मागणीचंही त्यांनी समर्थन केलं आहे.

बृजभूषण शरण सिंह आजकाल महिलांबाबत आक्षेपार्ह विधानं करत आहेत. त्यांची वक्तव्य अतिशय निंदनीय आहेत. हे पाप आहे. अशा लोकांना लगेच जेलमध्ये पाठवलं पाहिजे. त्यांना अटक झाली पाहिजे, असं बृजभूषण सिंह म्हणाले आहेत.

विनेश फोगाट, बजरंग पुनिया, साक्षी मलिक यांच्यासह अन्य पैलवान 23 एप्रिलपासून जंतर मंतरवर पैलवान आंदोलन करत आहेत. मागच्या महिनाभरापासून हे आंदोलन सुरू आहेत. भारतीय कुस्तीसंघाचे अध्यक्ष बृजभूषण शरण सिंह यांच्या लैंगिक छळ केल्याचा आरोप करण्यात आला आहे. त्यासाठी राजधानी दिल्लीत आंदोलन करण्यात येत आहे.

कुस्तीपटूंच्या या आंदोलनाला काँग्रेस नेत्या प्रियांका गांधी, काँग्रेसचे नेते रणदीप सुरजेवाला, दिल्लीचे मुख्यमंत्री अरविंद केजरीवाल त्याचबरोबर शेतकरी नेते राकेश टिकैत यांनी जंतर-मंतर मैदानावर जात या आंदोलनाला पाठिंबा दिला आहे. बृजभूषण सिंह यांच्या अटकेची मागणी त्यांनी केली आहे. आता बाबा रामदेव यांचाही या आंदोलनाला पाठिंबा मिळाला आहे. त्यांनी बृजभूषण सिंह यांच्या अटकेची मागणी केली आहे.

पंतप्रधान नरेंद्र मोदी, अमित शाह किंवा जेपी नड्डा यांनी मला सांगितलं तर मी लगोलग राजीनामा देईल, असं बृजभूषण सिंह यांनी म्हटलं आहे. बृजभूषण सिंह हे सहा वेळा खासदार राहिले आहेत. त्यांच्या पत्नीदेखील खासदार होत्या. त्यांचा मुलगाही आमदार आहे. आता त्यांच्या राजीनाम्यासह अटकेची मागणी होत आहे.

दरम्यान, नव्या संसद भवनाचं 28 मेला म्हणजे उद्या उद्घाटन होणार आहे. उद्घाटनाच्या दिवशी या पैलवानांनी महापंचायतीचं आयोजन केलं आहे. त्यामुळे हे आंदोलन आता कसं वळण घेणार हे पाहणं महत्वाचं असेल.