Pan Masala Ban Rule : पान मसाल्याच्या प्लास्टिक पॅकिंगवर बंदी, या तारखेपासून नवा नियम लागू; नेमकं काय बदलणार?
नव्या नियमांनुसार पान मसाल्याच्या पॅकिंगसाठी पॉलीएथिलीन, पॉलीप्रोपिलीन, पॉलीएस्टर, PVC तसेच इतर सिंथेटिक पॉलिमर आणि लॅमिनेटचा वापर करता येणार नाही.
Pan Masala Packaging Rules : पान मसाला सेवन करणाऱ्यांसाठी महत्त्वाची बातमी समोर आली आहे. भारतीय अन्न सुरक्षा आणि मानक प्राधिकरण अर्थात FSSAI ने पान मसाल्याच्या पॅकेजिंगसंदर्भातील नियम अधिक कडक केले आहेत. नव्या नियमांनुसार पान मसाला उत्पादनांच्या पॅकिंगमध्ये प्लास्टिक किंवा काही प्रकारच्या सिंथेटिक साहित्याचा वापर करण्यास बंदी घालण्यात आली आहे. हे बदल 10 ऑगस्ट 2026 पासून लागू होणार असल्याचे सांगण्यात आले आहे.
नव्या नियमांनुसार पान मसाल्याच्या पॅकिंगसाठी पॉलीएथिलीन, पॉलीप्रोपिलीन, पॉलीएस्टर, PVC तसेच इतर सिंथेटिक पॉलिमर आणि लॅमिनेटचा वापर करता येणार नाही. याशिवाय अॅल्युमिनियम फॉइल आणि मेटलाइज्ड लेयरच्या वापरावरही निर्बंध असतील. त्यामुळे पान मसाला उत्पादक कंपन्यांना पॅकेजिंगची पद्धत बदलावी लागणार आहे.
आता कशा प्रकारचे पॅकेजिंग दिसणार?
प्लास्टिक आणि अॅल्युमिनियम फॉइलला पर्याय म्हणून पर्यावरणपूरक साहित्य वापरण्यावर भर दिला जाणार आहे. FSSAIच्या मार्गदर्शक सूचनांनुसार पेपर, पेपर बोर्ड, सेलुलोज, टिन किंवा काचेच्या डब्यांचा वापर केला जाऊ शकतो. त्यामुळे आगामी काळात बाजारात पान मसाल्याच्या पॅकिंगमध्ये मोठा बदल पाहायला मिळण्याची शक्यता आहे.
पान मसाला महागणार का?
नव्या पॅकेजिंग नियमांचा थेट परिणाम उत्पादन खर्चावर होण्याची शक्यता आहे. कंपन्यांना नवीन पॅकेजिंग साहित्य तसेच त्यासाठी आवश्यक यंत्रसामग्रीची व्यवस्था करावी लागणार आहे. कागद, टिन किंवा काच यांसारख्या पर्यायी साहित्याचा खर्च तुलनेने अधिक असल्यास उत्पादनाचा खर्च वाढू शकतो. त्यामुळे भविष्यात पान मसाल्याच्या किमती वाढण्याची शक्यता व्यक्त केली जात आहे.
नेमकं काय नुकसान होऊ शकतं?
दरम्यान, प्लास्टिकऐवजी इतर साहित्य वापरल्यामुळे उत्पादनाची सेल्फ लाइफ, वाहतूक आणि साठवणूक याबाबतही कंपन्यांना नव्या आव्हानांना सामोरे जावे लागू शकते. वाहतुकीदरम्यान पॅकेजिंग खराब होऊन उत्पादनाचे नुकसान होण्याचा धोका वाढण्याची शक्यता आहे.
