बस चालकाच्या घरात सोनं अन् पैशांचा डोंगर, मशिनलाही पैसा मोजता येईना, आतापर्यंतची सर्वात मोठी रेड

एखाद्या चित्रपटाला शोभावा असाच हा प्रसंग आहे, तुम्ही अनेकदा चित्रपटांमध्ये पाहिलं असेल की एखादं गुप्त भुयार असतं, आणि त्यामधून नोटांनी भरलेल्या पिशव्या, सोनं, चांदी बाहेर काढलं जातं, अशीच एक घटना घडली आहे. पोलिसांनी एका झोपडी सारख्या दिसणाऱ्या घरावर छापा टाकला आणि त्यानंतर त्यांच्या हाती या घरात जे काही लागलं ते पाहून त्यांना देखील घाम फुटला आहे. पोलिसांना छाप्यामध्ये एवढे पैसे सापडले की, पैसे मोजता -मोजता पाच मशीन्स बंद पडल्या, तरी देखील पूर्ण कॅश मोजता आलेली नाहीये, तुम्हाला हे ऐकून आश्चर्य वाटेल ज्या घरात ही एवढी कॅश सापडली, ते घर एका सामान्य ड्रायव्हरचं होतं. ही घटना पश्चिम बंगालच्या बीरभूमी जिल्ह्यात घडली आहे. एका माजी सरकारी बस ड्रायव्हरच्या घरावर पोलिसांनी छापा टाकाला, या छाप्यामध्ये या बस चालकाच्या घरातून तब्बल 20 कोटी रुपये रोख आणि 15 किलो सोन्याचे बिस्कीट पोलिसांनी जप्त केले आहेत.

35 गोण्यांमध्ये ठेवले होते पैसे

पोलिसांना या बस चालकाकडे पैसे असल्याची गुप्त माहिती मिळाली होती. मिळालेल्या गुप्त माहितीनुसार पोलिसांनी या ड्रायव्हरच्या घरी छापा टाकला.मीनार मंडल असं या बस चालकाचं नाव आहे, पोलिसांनी जेव्हा त्याच्या घरावर छापा टाकला तेव्हा त्यांनी कल्पना देखील केली नव्हती की त्याच्या घरात एवढ्या मोठ्या प्रमाणात काळा पैसा असेल. मीनार मंडल हा सरकारी बसचा ड्रायव्हर होता. तो याच परिसरात राहणाऱ्या दगडांच्या खाणीचा व्यापारी असणाऱ्या टुलू मंडलच्या पत्नीचा भाऊ आहे. पोलिसांनी छापा टाकला, समोर सोन आणि पैसा पाहून पोलिसांनाही विश्वास बसत नव्हता, तब्बल 35 गोण्यांमध्ये हा पैसा भरून ठेवला होता.

पैसे मोजण्यासाठी 5 मशीन

पोलिसांनी तब्बल 5 मशीनच्या मदतीने हा पैसा मोजला अनेक तास पोलीस हा पैसा मोजतच होते, परंतु पैसे काही संपण्याचं नाव घेत नव्हते. पोलिसांनी ही संपत्ती जप्त करण्यासाठी 5 मोठे लोखंडाचे बॉक्स मागवले होते, यामध्ये ही संपत्ती भरण्यात आली. तसेच घटनास्थळावरून तब्बल 15 किलो सोनं देखील जप्त करण्यात आलं आहे. दरम्यान हा पैसा खाण व्यापाराशी संबंधित असावा असा संशय पोलिसांना आहे, घटनेबाबत अधिक तपास सुरू असल्याची माहिती पोलिसांकडून देण्यात आली आहे.