‘राईट मॅन इन राँग पार्टी’, राघव चढ्ढा यांच्या एका निर्णयाने केजरीवालांची झोपच उडाली
आम आदमी पक्षाचे माजी राज्यसभा खासदार राघव चड्ढा यांनी पक्षाचा राजीनामा दिला असून भारतीय जनता पक्षात सामील होण्याची घोषणा केली आहे. दिल्लीत आयोजित पत्रकार परिषदेत त्यांनी सांगितले की, ते चुकीच्या पक्षात योग्य व्यक्ती होते आणि आता त्यांना जनतेच्या अधिक जवळ जायचे आहे.
आम आदमी पार्टीचे राज्यसभा खासदार राघव चड्ढा यांनी पक्षाचा राजीनामा देत भाजपमध्ये सामील होण्याची घोषणा केली आहे. शुक्रवारी दिल्लीत एका पत्रकार परिषदेत त्यांनी ही माहिती दिली. यावेळी त्यांच्यासोबत मंचावर संदीप पाठक आणि अशोक मित्तल देखील उपस्थित होते. विशेष म्हणजे, अशोक मित्तल यांच्या घरावर काही दिवसांपूर्वीच ईडीने छापेमारी केली होती. चड्ढा यांनी दावा केला की, त्यांच्यासोबत पक्षाचे दोन-तृतीयांश खासदारही भाजपमध्ये प्रवेश करतील.
संविधानातील तरतुदींनुसार भाजपमध्ये विलीन होऊ – राघव चड्ढा
राघव चड्ढा म्हणाले की, “गेल्या काही वर्षांपासून मला असे वाटत होते की, मी एका चुकीच्या पक्षात असलेला योग्य माणूस आहे. आम्ही असा निर्णय घेतला आहे की, संविधानातील तरतुदींचा वापर करून आम्ही स्वतःला भाजपमध्ये विलीन करू.” ते पुढे म्हणाले, “ज्या ‘आप’ला मी माझ्या रक्ताने आणि घामाने सिंचले आणि माझ्या तारुण्याची १५ वर्षे दिली, तो पक्ष आता आपल्या सिद्धांतांपासून, मूल्यांपासून आणि मूळ नैतिकतेपासून भरकटला आहे. आता हा पक्ष देशाच्या हितासाठी नाही, तर केवळ स्वतःच्या वैयक्तिक फायद्यासाठी काम करत आहे.”
त्यांनी पुढे नमूद केले की, “गेल्या काही वर्षांपासून मला जाणीव होत होती की मी बरोबर आहे, पण चुकीच्या पक्षात आहे. म्हणूनच आज मी घोषणा करतो की, मी ‘आप’पासून अंतर राखत असून जनतेच्या जवळ जात आहे.”
“राजकारणात येण्यापूर्वी मी एक सराव करणारा चार्टर्ड अकाउंटंट (CA) होतो. या मंचावर माझ्यासोबत वेगवेगळ्या क्षेत्रातील लोक होते. काही शास्त्रज्ञ होते, तर काही शिक्षणतज्ज्ञ. या सर्व लोकांनी आपले सर्वस्व त्यागून, भ्रष्टाचारमुक्त भारत घडवण्याच्या संकल्पाने एकत्र येऊन या पक्षाची स्थापना केली होती,” असेही चड्ढा यांनी सांगितले.
