हिंदू दुकानदारांकडूनच बिर्याणी खा…; ऐन नवरात्रीत कुणी काढला अजब फतवा?
हिंदू दुकानदारांकडूनच बिर्याणी खावा,अशा आशयाचे पोस्टर लावण्यात आले आहेत. या पोस्टरची सर्वत्र चर्चा होत आहे. यावरून नव्या वादाला तोंड फुटलं आहे.
देशभरात नवरात्रीचा उत्साह पाहायला मिळत आहे. पश्चिम बंगालच्या सिलीगुडीच्या दुर्गा पूजादरम्यान हिंदू जागरण मंचाच्या पोस्टरने नव्या वादाला तोंड फुटलं आहे. मटण, बिर्याणीची खरेदी फक्त हिंदू दुकानदारांकडून खरेदी करण्याचं आवाहन हिंदू जागरण मंचाने केलं आहे. बिर्याणी फक्त हिंदू दुकानदारांकडून खावा, अशा आशयाचं पोस्टर लावण्यात आले आहेत. शहरातील विविध भागात हे पोस्टर लावण्यात आले आहेत. विशेष म्हणजे हे पोस्टर मंत्री शंकर घोष यांच्या घराच्या समोर लावले आहेत.
सिलिगुडीच्या भारतनगरमध्ये तरुण तीर्थ क्लब द्वारे दुर्गा पूजा मैदानाच्या समोर मंत्री शंकर घोष यांचं घर आहे. त्यांच्या घरासमोरील मैदानात हे पोस्टर्स लावण्यात आले आहेत. एका पोस्टरवर लिहिलं आहे की, ‘हिंदू दुकानदारांकडून मटण खरेदी करावे’. दुसर्‍या पोस्टरवर लिहिलं की, बिर्याणी खाण्यावर कोणतीही बंदी नाही. परंतु ही बिर्याणी हिंदू दुकानात खरेदी करावी, या पोस्टरमुळे लोकांमध्ये चर्चांना उधाण आलं आहे. लोक रस्त्यावर थांबून पोस्टर वाचत आहेत. या मुद्द्यावरून राजकारण तापलं आहे.
सिलीगुडीचे माजी महापौरांनी यावरून राज्य सरकारवर टीका केली आहे. हिंदू जागरण मंचचे प्रतिनिधी अभिषेक दास यांनी म्हटलं की, आम्ही स्वत: पोस्टर्स लावले आहेत. ही गोष्ट फक्त भारतनगरची नाही. तर संपूर्ण शहरात पोस्टर लावण्यात आले आहेत. या पोस्टरमधून हिंदू जागरण मंचाला हिंदू एकतेचा संदेश द्यायचा असल्याचे त्यांनी म्हटलं आहे. या पोस्टरवर मंत्री शंकर घोष म्हणाले, मला माहिती नाही की, हे पोस्टर कोणी लावले आहेत. आता ज्याने पोस्टर लावले आहेत,तेच लोक याविषयी सांगू शकतात’. तर माजी महापौर अशोक भट्टाचार्य यांनी या मुद्द्यावरून राज्य सरकारला घेरलं आहे. हा प्रोपागंडा आहे. आरएसएस धर्माच्या नावावर द्वेष पेरत आहे. भाजपनेच हे पोस्टर लावल्याचा आरोप त्यांनी केला. त्यांनी पुढे म्हटलं की, कोण काय खातं, कोण कुठून खरेदी करतात, कोणाला कुठून खरेदी करायचं नाही, मग तो बंगाली असो, हिंदू, मुस्लि, बिहारी किंवा मारवडी…प्रत्येक व्यक्तीला हे ठरवण्याची संधी द्यावी. आम्ही असा प्रपोगंडा कधी पाहिला नाही. आम्ही ज्याचा सामना करत आहोत, त्यामागे भाजप आहे’.
