काजोल-आमिर खानचं पावसातील प्रचंड रोमँटिक गाणं, पुन्हा-पुन्हा ऐकलं तरी भरत नाही मन
5 मिनिट 16 सेकंदाचं आमिर खान आणि काजोलचं पावसातील प्रचंड रोमँटिक गाणं, जे 20 वर्षानंतर देखील प्रत्येकाचं आहे आवडतं. आजही पुन्हा-पुन्हा ऐकतात लोक.
बॉलिवूडमध्ये पावसाच्या सरी आणि रोमँटिक गाण्यांचे नाते नेहमीच खास राहिले आहे. अशाच सदाबहार गाण्यांपैकी एक म्हणजे ‘देखो ना’, जे 2006 मध्ये प्रदर्शित झालेल्या ‘फना’ चित्रपटातील लोकप्रिय रोमँटिक गाणं आहे. जवळपास 20 वर्षांनंतरही हे गाणे रसिकांच्या मनावर अधिराज्य गाजवत असून पावसाळ्यात आजही अनेकांच्या प्लेलिस्टमध्ये कायम आहे.
हे गाणे सोनू निगम आणि सुनिधी चौहान यांनी आपल्या सुरेल आवाजात गायले आहे. जतिन-ललित यांनी संगीतबद्ध केलेल्या या गाण्याचे शब्द प्रसून जोशी यांनी लिहिले आहेत. पावसाच्या पार्श्वभूमीवर चित्रित झालेल्या या गाण्यात आमिर खान आणि काजोल यांची अप्रतिम केमिस्ट्री प्रेक्षकांच्या विशेष पसंतीस पडली.
या गाण्याची लोकप्रियता आजही कायम आहे. यशराज फिल्म्सच्या अधिकृत यूट्यूब चॅनेलवरील या गाण्याच्या व्हिडिओला 4.4 कोटींहून अधिक व्ह्यूज मिळाले आहेत, तर लिरिकल व्हर्जनलाही 1.5 कोटींपेक्षा जास्त वेळा पाहिले गेले आहे. सोशल मीडियावरही या गाण्यावर अनेक रील्स तयार होत आहेत.
‘फना’ या चित्रपटाचे दिग्दर्शन कुणाल कोहली यांनी केले होते. आमिर खान आणि काजोल यांच्यासह ऋषी कपूर, किरण खेर, तब्बू आणि अली हाजी यांनीही महत्त्वाच्या भूमिका साकारल्या होत्या.
सुमारे 30 कोटी रुपयांच्या बजेटमध्ये तयार झालेला हा चित्रपट 26 मे 2006 रोजी प्रदर्शित झाला. बॉक्स ऑफिसवर 100 कोटी रुपयांहून अधिक कमाई करत तो त्या वर्षातील सर्वाधिक यशस्वी चित्रपटांपैकी एक ठरला.
