4 वेळा गर्भपात, घेतली 65 इंजेक्शन, तरीही हार न मानता ही अभिनेत्री लग्नानंतर 10 वर्षांनी होणार आई
टीव्ही इंडस्ट्रीमधील या अभिनेत्रीने मातृत्वासाठी सहन केल्या अनेक वेदना. चार वेळा केला गर्भपात. आता वयाच्या 45 व्या वर्षी बनणार आहे आई. कोण आहे ती अभिनेत्री?
भोजपुरी आणि टीव्ही इंडस्ट्रीतील लोकप्रिय अभिनेत्री संभावना सेठच्या आयुष्यात लवकरच आनंदाची बातमी येणार आहे. लग्नानंतर तब्बल 10 वर्षांनी ती आई होणार असून सरोगसीच्या माध्यमातून ती मातृत्वाचा अनुभव घेणार आहेत. ही आनंदाची बातमी तिने स्वतः सोशल मीडियावर चाहत्यांसोबत शेअर केली आहे.
संभावना सेठने 14 जुलै 2016 रोजी अविनाश मिश्रा यांच्याशी विवाह केला होता. लग्नापूर्वी दोघांनी जवळपास 5 वर्षे एकमेकांना डेट केलं होतं. आता लग्नानंतर 10 वर्षांनी तिच्या आयुष्यात नव्या पाहुण्याचं आगमन होणार आहे.
संभावना सेठसाठी आई होण्याचा प्रवास अजिबात सोपा नव्हता. तिने अनेक वर्षे नैसर्गिक पद्धतीने गर्भधारणा होण्यासाठी प्रयत्न केले. त्यानंतर तिने IVF चा पर्यायही स्वीकारला. या प्रक्रियेदरम्यान तिला अनेक इंजेक्शन्स आणि वैद्यकीय उपचारांचा त्रास सहन करावा लागला.
तिने एका व्लॉगमध्ये सांगितलं होतं की, या प्रक्रियेत तिला तब्बल 65 इंजेक्शन्स घ्यावी लागली, जी अत्यंत वेदनादायक होती. मात्र, आई होण्याच्या इच्छेपोटी तिने हे सगळं सहन केलं. तिने आयुष्यात अनेकदा गर्भपाताचा दुःखद अनुभव घेतला आहे.
संभावना सेठने केवळ एक-दोन वेळा नाही तर तब्बल चार वेळा मिसकॅरेजचा सामना केला आहे. या सगळ्या वेदनादायक अनुभवांनंतरही तिने हार मानली नाही आणि आई होण्याचं स्वप्न जिवंत ठेवलं. आता तिच्या आयुष्यात नव्या आनंदाची चाहूल लागली असून चाहतेही या आनंदात सहभागी झाले आहेत.
