महागड्या लिंबाला म्हणा बाय बाय, शरीराला कूल ठेवण्यासाठी स्वस्त पर्याय काय?
वाढत्या तापमानासोबतच लिंबाच्या दरानेही उच्चांक गाठला आहे. लिंबू महाग झाले असले तरी कोकम, ताक, कैरीचे पन्हे आणि आवळा यांसारख्या स्वस्त आणि नैसर्गिक पर्यायांनी तुम्ही उन्हाळ्यात स्वतःला हायड्रेटेड ठेवू शकता. अधिक माहितीसाठी हा लेख वाचा.
राज्यासह देशभरात उन्हाचा कडाका वाढू लागला आहे. वाढत्या तापमानामुळे हैराण झालेले नागरिक थंडाव्यासाठी लिंबू सरबताचा आधार घेतात. मात्र, वाढत्या मागणीमुळे लिंबाच्या दराने उच्चांक गाठला आहे.
किरकोळ बाजारात सध्या एका लिंबासाठी १० ते १५ रुपये मोजावे लागत असल्याने सामान्य ग्राहकांच्या खिशाला कात्री लागत आहे. अशा परिस्थितीत लिंबाला पर्याय देऊन तुम्ही काही नैसर्गिक आणि स्वस्त पर्यायांचा वापर करून उन्हाळ्याचा आनंद घेऊ शकता.
कोकणची ओळख असलेले कोकम सरबत पित्तशामक आणि शरीरातील उष्णता शोषून घेणारे आहे. तसेच, कच्च्या कैरीचे पन्हे उन्हाळ्यात उन्हापासून संरक्षण करण्यासाठी रामबाण उपाय मानले जाते.
ताक हे खिशाला परवडणारे अमृत म्हणून ओळखले जाते. उन्हाळ्यात दह्यापासून बनवलेले ताक हे सर्वोत्तम पेय आहे. यामध्ये जिरे पूड आणि काळे मीठ टाकल्यास ते केवळ शरीराला थंडावाच देत नाही, तर पचनशक्ती देखील सुधारते.
उन्हाळ्याच्या दिवसात बेल फळाचे सरबत अत्यंत गुणकारी ठरते. हे पोटाचे विकार दूर ठेवते. तसेच शरीरातील पाण्याचे प्रमाण संतुलित राखण्यास मदत करते.
लिंबाला व्हिटॅमिन 'सी'चा सर्वोत्तम पर्याय म्हणजे आवळा. आवळ्याचा रस नियमित घेतल्यास रोगप्रतिकारशक्ती वाढते आणि कडक उन्हातही उत्साह टिकून राहतो.
यासोबतच नैसर्गिक थंडावा देणारे वाळ्याचे सरबत किंवा गुलकंदाचे सरबत घेतल्याने शरीराचे तापमान नियंत्रित राहते. तसेच उन्हामुळे होणारी जळजळ कमी होते.
त्यामुळे लिंबू महाग झाले असले तरी निसर्गात उपलब्ध असलेल्या या पर्यायांचा वापर करून तुम्ही स्वतःला हायड्रेटेड ठेवू शकता.
