‘दृश्यम’सारखाच तगडा सस्पेन्स, थरकाप उडवणारा क्लायमॅक्स; ‘मस्ट वॉच’मध्ये करा समावेश
सस्पेन्स आणि थ्रिलर सिनेमांची क्रेझ असणाऱ्या प्रेक्षकांसाठी सध्या ओटीटीवर अनेक दमदार पर्याय उपलब्ध आहेत. अजय देवगणच्या ‘दृश्यम 3’ची चर्चा सुरू असतानाच, त्याआधी काही भन्नाट सस्पेन्स थ्रिलर सिनेमे पाहण्याची संधी प्रेक्षकांना मिळू शकते.
ह्यू जॅकमॅन अभिनीत 'प्रिजनर्स' (Prisoners) हा 2013 मध्ये प्रदर्शित झालेला सायकोलॉजिकल थ्रिलर आहे. एका वडिलांची मुलगी अचानक बेपत्ता होते आणि तिचा शोध घेण्यासाठी ते स्वतः तपास सुरू करतात. मुलीच्या शोधादरम्यान संशय, अस्वस्थता आणि नैतिक प्रश्नांची गुंतागुंत वाढत जाते. डेनिस व्हिलेन्यूव्ह दिग्दर्शित हा सिनेमा प्राइम व्हिडीओवर पाहता येतो.
विजय सेतुपती यांचा ‘महाराजा’ हा सस्पेन्स थ्रिलरच्या चाहत्यांसाठी चांगला पर्याय आहे. सुरुवातीला साधी वाटणारी कथा जसजशी पुढे जाते, तसतसे अनेक रहस्यांचे पदर उलगडत जातात. चित्रपटाचा शेवट प्रेक्षकांना मोठा धक्का देतो. त्यामुळे कथा आधीच माहीत असलेल्या प्रेक्षकांनाही हा चित्रपट पुन्हा पाहताना वेगळा अनुभव मिळू शकतो. ‘महाराजा’ नेटफ्लिक्सवर उपलब्ध आहे.
क्राइम आणि सस्पेन्सचा जबरदस्त मिलाफ असलेला 'नो कंट्री फॉर ओल्ड मेन' (No Country for Old Men) हा कोएन बंधूंचा गाजलेला चित्रपट आहे. एका व्यक्तीच्या हाती पैशांनी भरलेली बॅग लागते आणि त्यानंतर त्याच्या मागावर एक धोकादायक किलर लागतो. पैशांमागची धावपळ आणि जीव वाचवण्यासाठी सुरू झालेला संघर्ष चित्रपटाला वेगळीच दिशा देतो. हा चित्रपट नेटफ्लिक्सवर उपलब्ध आहे.
विद्या बालनचा ‘कहानी’ हा भारतीय सस्पेन्स थ्रिलरमधील महत्त्वाचा चित्रपट मानला जातो. पतीच्या मृत्यूमागचं सत्य शोधण्यासाठी एका महिलेचा सुरू झालेला प्रवास अनेक अनपेक्षित वळणं घेतो. चित्रपटाचा क्लायमॅक्स हा त्याचा सर्वात चर्चेतील भाग आहे. ‘कहानी’ प्राइम व्हिडीओवर उपलब्ध आहे.
मल्याळम सुपरस्टार मोहनलालचा ‘थुडारुम’ हा एका सामान्य टॅक्सी ड्रायव्हरच्या आयुष्यात घडणाऱ्या संशयास्पद घटनांभोवती फिरतो. पोलिस यंत्रणा आणि मुख्य पात्र यांच्यातील संघर्षातून सिनेमाचं रहस्य उलगडत जातं. या चित्रपटात मोहनलालने शनमुघनची भूमिका साकारली आहे. हा सिनेमा जियो हॉटस्टारवर उपलब्ध आहे.
