Vishakha Raut : विशाखा राऊतांना सुप्रीम कोर्टाचा मोठा दिलासा! रिक्त जागेवर…; कोर्टने नेमके काय दिले आदेश?

शिवसेना (ठाकरे गट) नगरसेविका विशाखा राऊत यांना सुप्रीम कोर्टाने जात प्रमाणपत्र प्रकरणी मोठा तात्पुरता दिलासा दिला आहे. जात प्रमाणपत्र अवैध ठरल्यामुळे त्यांचे नगरसेवकपद रद्द करण्यात आले होते. या निर्णयाविरोधात राऊत यांनी सुप्रीम कोर्टात धाव घेतली होती.

सुप्रीम कोर्टाने या प्रकरणाची दखल घेत महत्त्वपूर्ण निर्देश दिले आहेत. कोर्टाने राऊत यांच्या रिक्त झालेल्या जागेवर तातडीने कोणतीही निवडणूक न घेण्याचे आदेश दिले आहेत. तसेच, या प्रकरणी निवडणूक आयोग आणि विशाखा राऊत यांच्या प्रतिस्पर्धी प्रिया सरवणकर (शिंदे गट) यांना नोटीस बजावण्यात आली आहे. कोर्टाने स्पष्ट केले आहे की, या प्रकरणाचा अंतिम निकाल लागेपर्यंत विशाखा राऊत यांची जागा भरण्यात येऊ नये. अपील प्राधिकरणाने कोणत्याही प्रभावाखाली न येता या अपिलावर निर्णय घ्यावा, असेही कोर्टाने सूचित केले आहे.

यामुळे विशाखा राऊत यांना सध्या तरी त्यांचे नगरसेवकपद वाचवण्यासाठी वेळ मिळाला असून, त्यांच्या राजकीय भवितव्यासाठी हा एक महत्त्वाचा टप्पा मानला जात आहे.