Gokul : गोकुळच्या सत्तासंघर्षात सतेज पाटलांना मोठा धक्का; चार शासननियुक्त संचालकांमुळे सत्तेचं गणितच बदललं

महायुती सरकारने गोकुळ दूध संघात चार शासननियुक्त तज्ञ संचालकांची नियुक्ती करण्याचा निर्णय घेतला आहे. या निर्णयामुळे काँग्रेस नेते सतेज पाटील यांना मोठा धक्का बसला आहे. नियुक्त करण्यात आलेल्या या चार सदस्यांना सहकारी संस्थेच्या कामकाजात मतदानाचा अधिकार देखील देण्यात आला आहे, ज्यामुळे गोकुळच्या अध्यक्ष निवडीचा महायुतीचा मार्ग मोकळा झाला आहे.

नुकत्याच झालेल्या निवडणुकीत सतेज पाटील यांच्या राजर्षी शाहू शेतकरी समविचारी आघाडीला १३ जागा मिळाल्या होत्या, तर महायुतीला १२ जागांवर विजय मिळाला होता. अध्यक्ष निवडीसाठी १४ सदस्यांची उपस्थिती आवश्यक असते. याआधी महायुतीच्या संचालकांनी दांडी मारल्याने अध्यक्ष निवड होऊ शकली नव्हती. आता चार शासननियुक्त संचालकांच्या नियुक्तीमुळे महायुतीच्या पॅनेलची संचालक संख्या वाढून १६ इतकी झाली आहे. यामुळे गोकुळवर महायुतीचा अध्यक्ष बसणार हे स्पष्ट झाले आहे. यावर प्रतिक्रिया देताना सतेज पाटील यांनी म्हटले आहे की, ते कायदेशीर मार्गाने या निर्णयाला आव्हान देतील आणि गप्प बसणार नाहीत.