GK : बिअर पिल्यामुळे मूत्रपिंडातील खडे बाहेर पडतात का?
Kidney Stone : अनेकांना मूतखड्याचा त्रास असतो, यामुळे पोटात वेदना होतात. बिअर पिल्यामुळे मूत्रपिंडातील खडे बाहेर पडण्यास मदत होते असा अनेकांचा समज आहे. मात्र यात किती सत्यता आहे ते जाणून घेऊयात.
किडनी स्टोन : बिअर प्यायल्यामुळे किडनीतील खडे (बाहेर पडतात, हा समाजात पसरलेला एक मोठा गैरसमज आहे. वैद्यकीय विज्ञानानुसार याचे उत्तर 'नाही' असे आहे. उलट, बिअरचे सेवन किडनीसाठी अधिक हानिकारक ठरू शकते.
डिहायड्रेशनचा धोका : बिअर हे 'डाययुरेटिक' आहे, म्हणजेच ते प्यायल्यामुळे लघवीचे प्रमाण वाढते. यामुळे शरीरातील पाणी झपाट्याने बाहेर पडते आणि शरीर डिहायड्रेट होते. किडनी स्टोन बाहेर पडण्यासाठी शरीरात पाण्याची पातळी जास्त असणे आवश्यक असते, पण बिअरमुळे शरीर कोरडे पडते, ज्यामुळे खडे अधिक घट्ट होऊ शकतात.
युरिक ॲसिड आणि प्युरीन : बिअरमध्ये 'प्युरीन' नावाचा घटक मोठ्या प्रमाणात असतो. प्युरीनच्या पचनानंतर शरीरात युरिक ॲसिड तयार होते. जर तुम्ही वारंवार बिअर प्यायली, तर शरीरात युरिक ॲसिडचे प्रमाण वाढून नवीन खडे तयार होण्याची प्रक्रिया वेगवान होते.
खड्याचा आकार महत्त्वाचा : जर किडनीतील खडा 5 मिमी पेक्षा मोठा असेल, तर तो कोणत्याही पेयाने आपोआप बाहेर पडू शकत नाही. अशा वेळी बिअरमुळे लघवीचा दाब वाढल्यास तो खडा नळीत (Ureter) अडकून तीव्र वेदना होऊ शकतात.
बिअर : बिअर हा किडनी स्टोनवरचा उपचार नाही. तात्पुरते लघवीचे प्रमाण वाढल्यामुळे खडा पडल्याचा भास होऊ शकतो, पण दीर्घकाळात हे शरीरासाठी नुकसानदायकच आहे. तुम्हाला असा त्रास होत असेल तर त्वरित डॉक्टरांचा सल्ला घ्या.
