अक्षया देवधरच्या आधी हार्दिकच्या आयुष्यात होती ही खास व्यक्ती, तिच्यामुळेच तो झाला कलाकार
अक्षया देवधर आणि हार्दीक जोशी यांचं लग्न मोठ्या थाटा-माटात झालं होतं. मात्र, अक्षयाच्या आधी हार्दिकच्या आयु्ष्यात ती व्यक्ती खूप खास आणि हार्दिकला जवळची होती. आजही तो भावुक होतो.
'तुझ्यात जीव रंगला' या लोकप्रिय मालिकेतून महाराष्ट्राच्या घराघरात पोहोचलेला अभिनेता हार्दिक जोशी आज मराठी मनोरंजन विश्वातील यशस्वी कलाकारांपैकी एक मानला जातो. मात्र, या यशामागे केवळ त्याची मेहनत नाही तर कुटुंबाची भक्कम साथही तितकीच महत्त्वाची होती.
विशेषतः त्याच्या दिवंगत वहिनींनी संघर्षाच्या काळात दिलेला आधार आजही हार्दिक विसरू शकलेला नाही. एका मुलाखतीत हार्दिकने आपल्या सुरुवातीच्या संघर्षमय दिवसांची आठवण सांगताना वहिनींबद्दल कृतज्ञता व्यक्त केली.
अभिनय क्षेत्रात स्थिर होण्यासाठी तो धडपड करत असताना त्याच्या वहिनींनी त्याच्यावर पूर्ण विश्वास ठेवला आणि प्रत्येक टप्प्यावर त्याला प्रोत्साहन दिले. त्यांच्या पाठिंब्यामुळेच आपण कलाकार म्हणून उभे राहू शकलो असे हार्दिकने भावूक होत सांगितले.
हार्दिकने अभिनेत्री अक्षया देवधर हिच्याशी विवाह केला असला, तरी त्याआधी त्याच्या आयुष्यात वहिनींचे स्थान अत्यंत खास होते. काही वर्षांपूर्वी त्यांच्या निधनामुळे संपूर्ण कुटुंबावर दुःखाचा डोंगर कोसळला. आजही त्यांच्या आठवणींनी हार्दिक भावूक होतो.
मुलाखतीत बोलताना हार्दिक म्हणाला की, संघर्षाच्या काळात तो ज्युनिअर आर्टिस्ट म्हणूनही काम करत होता. त्याच वेळी त्याच्या भावाने आणि वहिनींनी नवीन बुलेट मोटारसायकल घेतली होती. मात्र, महत्त्वाच्या ऑडिशन्स किंवा कामांसाठी जाताना वहिनी त्यालाच ती बुलेट वापरण्याचा आग्रह करायच्या. 'तू चांगल्या ठिकाणी जातोयस, बुलेट घेऊन जा. दादा रिक्षाने जाईल' असे त्या प्रेमाने म्हणायच्या. घरात वाहनांची फारशी सोय नसतानाही त्यांनी स्वतःपेक्षा माझ्या स्वप्नांना प्राधान्य दिले, असे हार्दिकने सांगितले.
