खूप थकवा जाणवतोय आई, थोडा वेळ झोपतो..; रील्स स्टार अरुण तुपेसोबत नेमकं काय घडलं?
छत्रपती संभाजीनगरमधील प्रसिद्ध रील स्टार अरुण तुपेचं निधन नेमकं कशामुळे झालं, असा सवाल मंगळवार सकाळपासून अनेकांकडून विचारला जात आहे. अशातच त्याच्या कुटुंबीयांनी काय माहिती दिली, ते वाचा..
छत्रपती संभाजीनगरमधील प्रसिद्ध रील स्टार अरुण तुपेचं मंगळवारी सकाळी निधन झालं. त्याच्या निधनाच्या वृत्ताने सर्वांनाच मोठा धक्का बसला. बालाजीनगर इथल्या राहत्या घरी त्याने अखेरचा श्वास घेतला. अरुणचं निधन हृदयविकाराच्या झटक्याने झाल्याचं कळतंय. त्याच्या पार्थिवावर फुलंब्री इथल्या मूळ गावी अंत्यसंस्कार करण्यात आले.
अरुणच्या कुटुंबीयांनी दिलेल्या माहितीनुसार, मंगळवारी सकाळी 6 वाजता अरुण उठला. नेहमीप्रमाणे त्याने कुटुंबीयांशी सर्वसामान्यपणे संवाद साधला. त्याला दहा वाजताच्या सुमारास शूटला जायचं होतं. परंतु त्यापूर्वी थकवा जाणवल्याने त्याने घरीच थोडा वेळ आराम करायचं ठरवलं.
आई, खूप थकवा जाणवतोय, थोडा वेळ झोपतो आणि मग शूटला जातो, असं त्याने आईला सांगितलं आणि तो झोपायला गेला. परंतु ही त्याच्या आयुष्याची शेवटची झोप ठरेल, याची कल्पनासुद्धा कोणी केली नव्हती. 9 वाजताच्या सुमारास जेव्हा त्याला उठवण्याचा प्रयत्न केला, तेव्हा तो शुद्धीवर नव्हता.
सोशल मीडियावर अरुण तुपेचा खूप मोठा चाहतावर्ग आहे. इन्स्टाग्रामवर त्याचे 207K फॉलोअर्स आहेत. विविध मुद्द्यांवर तो रील्स बनवायचा आणि त्याला लाखो व्ह्यूज मिळायचे. छत्रपती संभाजीनगरमध्ये त्याची विशेष लोकप्रियता होती. अरुणच्या निधनाने सर्वांनाच मोठा धक्का बसला आहे.
निधनाच्या काही तास आधीच अरुणने इन्स्टाग्रामवर एक रील्स पोस्ट केली होती. ही त्याची शेवटची पोस्ट ठरली. त्याच्या या रीलवर कमेंट करत नेटकऱ्यांनी शोक व्यक्त केला आहे. अरुणला अपस्मारचा (फिट) त्रास होता, अशी माहिती त्याच्या नातेवाईकांनी दिली.
