“बॉडीबिल्डर नाही तर बारिक मुलंच..”; वर्षभरापूर्वीच महवशने चहलसोबतच्या नात्याची दिली हिंट?
क्रिकेटर युजवेंद्र चहल आणि आरजे महवश यांच्या अफेअरच्या जोरदार चर्चा आहेत. अशातच महवशचा एक व्हिडीओ सोशल मीडियावर चर्चेत आला आहे. या व्हिडीओचं कनेक्शन नेटकरी चहलसोबत लावत आहेत. मुलींना कोणती मुलं आवडतात, याबद्दल ती यात सांगतेय.
क्रिकेटर युजवेंद्र चहल आणि आरजे महवश या दोघांमध्ये नेमकं काय शिजतंय, असा प्रश्न अनेकांना पडला आहे. धनश्रीला घटस्फोट दिल्यानंतर युजवेंद्र महवशला डेट करत असल्याच्या चर्चांना उधाण आलं आहे. या अफेअरच्या चर्चांदरम्यान महवशचा एक जुना व्हिडीओ सध्या सोशल मीडियावर व्हायरल होत आहे.
या व्हिडीओमध्ये महवश सांगतेय की मुलींना कोणत्या प्रकारची मुलं आवडतात? मुलींना बॉडीबिल्डरपेक्षा बारिक मुलंच जास्त आवडतात, असं महवश या व्हिडीओत म्हणतेय. हा तिचा व्हिडीओ वर्षभरापूर्वीचा आहे.
या व्हिडीओमध्ये महवश म्हणते, "मी असं काही म्हणणार आहे, जे प्रसिद्ध नाही. मुलींना बॉडीबिल्डर मुलांच्या तुलनेत बारिक मुलंच जास्त आवडतात. प्रत्येक मुलीला बॉडीबिल्डरच हवा असं गरजेचं नाही. जी मुलं सोशल मीडियावर आपली बॉडी दाखवतात, तीच मुलं नेहमी वैयक्तिक मेसेज करून टिप्स मागतात."
"मुलींचीही आवड-निवड आता बदलली आहे. डेटवर आता मुलीसुद्धा उकडलेली अंडी किंवा उकडलेल्या भाज्या ऑर्डर करत नाहीत तर मोमोजची प्लेट ऑर्डर करतात", असंही ती या व्हिडीओत म्हणतेय.
हा व्हिडीओ इन्स्टाग्रामवर शेअर करत महवशने लिहिलंय, 'प्रिय बॉडीविना मुलं.. तुमच्यासाठी आम्ही आहोत.' महवशचा हा व्हिडीओ आता चर्चेत आला असून ती युजवेंद्र चहलबद्दलच बोलत असल्याचं नेटकरी म्हणत आहेत.
'अच्छा तर हे युजवेंद्र चहलसाठी होतं', असं एकाने लिहिलं. तर 'म्हणजे ही इतक्या दिवसांपासून चहलबद्दलच बोलत होती', असं दुसऱ्याने म्हटलंय. 'म्हणूनच तू चहलची निवड केलीस का? तो बारिक आहे म्हणून..', असा सवाल नेटकऱ्यांनी केला आहे.
