12 दिवसात चार कसोटी सामन्यांचं आयोजन, कसं आणि कुठे ते जाणून घ्या
WTC 2025-2027: वर्ल्ड टेस्ट चॅम्पियनशिपच्या चौथ्या पर्वाला सुरुवात झाली आहे. अवघ्या 12 दिवसात 8 संघ कसोटी सामने खेळणार आहेत. भारत आणि इंग्लंड यांच्यातील कसोटी मालिका शुक्रवारपासून सुरू होईल, त्यानंतर ऑस्ट्रेलिया आणि दक्षिण आफ्रिका पुढील आठवड्यात जागतिक कसोटी अजिंक्यपद 2027 मालिकेतील त्यांचे पहिले सामने खेळतील.
वर्ल्ड टेस्ट चॅम्पियनशिप 2025 फायनल दक्षिण अफ्रिकेने जिंकली. आता वर्ल्ड टेस्ट चॅम्पियनशिपचं चौथं पर्व सुरु झालं आहे. या महिन्यात 8 संघ 4 कसोटी सामने खेळतील. या 4 मालिकांमध्ये टीम इंडियाचा देखील सहभा आहे. म्हणजेच, भारतीय संघ इंग्लंडविरुद्ध खेळून वर्ल्ड टेस्ट चॅम्पियनशिप 2027 मालिकेची सुरुवात करेल.
श्रीलंका विरुद्ध बांगलादेश: श्रीलंका आणि बांगलादेश वर्ल्ड टेस्ट चॅम्पियनशिप 2027 मालिकेतील पहिला सामना खेळत आहे. श्रीलंकेतील गॅले येथे या मालिकेतील पहिला सामना सुरु झाला आहे. या मालिकेत बांगलादेश-श्रीलंका एकूण दोन कसोटी सामने खेळणार आहे.
भारत विरुद्ध इंग्लंड: भारत आणि इंग्लंड यांच्यातील कसोटी मालिका 20 जूनपासून सुरू होणार आहे. या मालिकेत एकूण 5 सामने खेळले जातील. शुक्रवारी होणारा पहिला सामना लीड्समधील हेडिंग्ले स्टेडियमवर होणार आहे आणि शुबमन गिल या सामन्याद्वारे भारतीय कसोटी संघाचा कर्णधार म्हणून पदार्पण करेल.
वेस्ट इंडिज विरुद्ध ऑस्ट्रेलिया: वेस्ट इंडिज आणि ऑस्ट्रेलिया यांच्यातील कसोटी मालिका 25 जूनपासून सुरू होणार आहे. या मालिकेचा पहिला सामना वेस्ट इंडिजमधील बार्बाडोस येथे होणार आहे आणि या मालिकेत दोन्ही संघ एकूण 3 कसोटी सामने खेळतील.
झिम्बाब्वे विरुद्ध दक्षिण आफ्रिका: जागतिक कसोटी विजेता दक्षिण आफ्रिका 28 जून रोजी झिम्बाब्वेविरुद्ध सामना खेळणार आहे. झिम्बाब्वेमध्ये होणाऱ्या या कसोटी मालिकेत एकूण 2 सामने खेळवले जातील. त्यानुसार, जूनच्या अखेरीस एकूण 8 संघ कसोटी मालिका सुरू करतील. पण हा सामना वर्ल्ड टेस्ट कसोटीचा भाग नसेल. कारण झिम्बाब्वे हा संघ वर्ल्ड टेस्ट चॅम्पियनशिपचा भाग नाही.
