ना मोठा हिरो, ना बिग बजेट..; 63 वर्षीय अभिनेत्रीची कमाल, 10 दिवसांत 5 पट अधिक कमाई, IMDb वर 8.2 रेटिंग
या चित्रपटाने बॉक्स ऑफिसवर अक्षरश: धुमाकूळ घातला आहे. गेल्या दहा दिवसांत या चित्रपटाने बजेटच्या पाच पट अधिक कमाई करत निर्मात्यांना मालामाल केलं आहे. या चित्रपटाची कथासुद्धा जबरदस्त असून आयएमडीबीवर त्याला चांगली रेटिंग मिळाली आहे.
Thaai Kazhavi Budget and Collection: ज्या चित्रपटांमध्ये लोकप्रिय चेहरे नसतात किंवा ज्याचं बजेट कमी असतं, अशा चित्रपटांना सहसा बॉक्स ऑफिसवर विशेष यश मिळत नाही. परंतु त्याला काही अपवादसुद्धा ठरतात. कारण दाक्षिणात्य चित्रपटसृष्टीतील एक चित्रपट सध्या बॉक्स ऑफिसवर जबरदस्त कमाई करतोय. या चित्रपटाचा बजेट कमी असून त्यात कोणताही मोठा हिरो किंवा हिरोइन नाही.
या तमिळ चित्रपटाचं नाव आहे थाई किझावी. अत्यंत कमी बजेट बनलेल्या या कॉमेडी चित्रपटाला प्रेक्षकांकडून जबरदस्त प्रतिसाद मिळतोय. 27 फेब्रुवारी 2026 रोजी हा चित्रपट थिएटरमध्ये प्रदर्शित झाला असून बॉक्स ऑफिसवर त्याची तगडी कमाई होत आहे.
शिवकुमार मुरुगेसन दिग्दर्शित 'थाई किझावी' हा चित्रपट एक कॉमेडी ड्रामा आहे. विशेष म्हणजे यात कोणताच ओळखीचा स्टार नाही. किंबहुना 63 वर्षांच्या ज्येष्ठ अभिनेत्रीच्या जोरावर हा चित्रपट बॉक्स ऑफिसवर कमाल कामगिरी करतोय.
दाक्षिणात्य चित्रपटसृष्टीतील ज्येष्ठ अभिनेत्री राधिका सरथकुमार यांच्या 'थाई किझावी' या चित्रपटाचं बजेट फक्त 9 कोटी रुपये असल्याचं कळतंय. इतक्या कमी बजेटमध्ये बनलेल्या या चित्रपटाने प्रदर्शनाच्या 10 दिवसांत जगभरात 50 कोटी रुपयांची कमाई केली आहे.
'सॅकनिल्क'ने दिलेल्या वृत्तानुसार, या चित्रपटाने जगभरात 11 दिवसांत 54 कोटी रुपयांचा गल्ला जमवला आहे. तर भारतात या चित्रपटाने 38 कोटी रुपये कमावले आहेत. थाई किझावीने पहिल्या दिवशी 2.65 कोटी रुपये कमावले होते. IMDb वर या चित्रपटाला 8.2 रेटिंग मिळाली आहे.
