अंबानींच्या अँटिलियात कोणत्या हॉटेलमधून नाश्ता येतो? एक ठिकाण तर प्रत्येक मुंबईकराला माहिती असेलच…
मुकेश अंबानींच्या अँटिलियामध्ये आजही मुंबईतील दोन अत्यंत जुन्या आणि प्रसिद्ध ठिकाणांहून नाश्ता येतो. यातील एक ठिकाण तर प्रत्येक मुंबईकराच्या परिचयाचे आहे. जाणून घ्या कोणती आहेत ही हॉटेल्स.
जगातील सर्वात श्रीमंत व्यक्तींच्या यादीत असूनही, रिलायन्स इंडस्ट्रीजचे सर्वेसर्वा मुकेश अंबानी त्यांच्या साध्या सवयींसाठी ओळखले जातात. कोट्यवधींच्या अँटिलियामध्ये राहूनही त्यांना मुंबईच्या गजबजलेल्या रस्त्यांवरील जुन्या हॉटेल्सची चव आजही खुणावते.
विशेषतः मुंबईतील दोन प्रसिद्ध खाद्यालये अंबानी कुटुंबाच्या विशेष पसंतीची आहेत. यातील पहिलं म्हणजे ताडदेव येथील स्वाती स्नॅक्स (Swati Snacks). हे अंबानी कुटुंबाचे अत्यंत आवडते ठिकाण आहे.
नीता अंबानी आणि मुकेश अंबानी यांना येथील पंकी हा पदार्थ मनापासून आवडतो. हा पदार्थ केळीच्या पानात तांदळाच्या पिठाचे सारण लावून वाफवून तयार केला जातो. जेव्हा कधी अंबानींच्या घरी पाहुणे येतात, तेव्हा त्यांच्या आदरातिथ्यासाठी स्वाती स्नॅक्समधून खास पदार्थ मागवले जातात.
मुकेश अंबानी यांच्या महाविद्यालयीन आठवणी माटुंगा येथील प्रसिद्ध म्हैसूर कॅफे (Mysore Cafe) शी जोडलेल्या आहेत. ते शाळेत असताना या ठिकाणी नियमितपणे दाक्षिणात्य पदार्थांचा आस्वाद घ्यायला यायचे.
आजही, या कॅफेमधील इडली आणि सांबारची चव त्यांच्या घरी तितकीच आवडीने खाल्ली जाते. श्रीमंतीच्या शिखरावर असूनही त्यांनी आपली ही जुनी आवड आजही जोपासली आहे.
अंबानींच्या आलिशान घरात पंचतारांकित सोयी असल्या, तरी मुकेश अंबानींचा रोजचा नाश्ता मात्र अत्यंत पौष्टिक आणि साधा असतो. त्यांच्या आहारात प्रामुख्याने ताजी फळे, भारतीय पारंपारिक पदार्थ हे असतात.
