बिअरमध्ये शेंगदाणे टाकल्यानंतर बुडण्याऐवजी वर का येतात? 99 टक्के दारुप्रेमींना मॅजिकच माहिती नाही
बिअरच्या ग्लासमध्ये शेंगदाणे टाकल्यावर ते वर-खाली का तरंगतात? अर्जेन्टिनामध्ये प्रसिद्ध असलेल्या 'डान्सिंग पीनट्स' या प्रकारामागील रंजक वैज्ञानिक कारण आणि कार्बन डायऑक्साइडची भूमिका काय?
सोशल मीडियावर अनेकदा विचित्र दावे केले जातात, परंतु काही गोष्टींमागे मात्र निव्वळ विज्ञान दडलेले असते. बिअरच्या ग्लासमध्ये शेंगदाणे टाकल्यावर ते तळाशी न बसता अचानक वर-खाली का तरंगू लागतात, याचा तुम्ही कधी विचार केला आहे का? आज आपण याच रंजक प्रश्नामागचे वैज्ञानिक रहस्य उलगडणार आहोत.
बिअरच्या ग्लासमध्ये टाकलेले शेंगदाणे तरंगणे यालाच शास्त्रीय भाषेत डान्सिंग पीनट्स (Dancing Peanuts) असे म्हणतात. ही प्रक्रिया नेमकी कशी घडते, त्याबद्दलची रंजक माहिती समोर आली आहे.
बिअर पिताना चकणा म्हणून शेंगदाणे खाणं अनेकांना आवडतं. मग ते भाजलेले असोत किंवा खारट. असं म्हटलं जातं की, खारट शेंगदाण्यांमुळे बिअरची कडवट चव संतुलित होते.
तसेच, शेंगदाण्यातील प्रथिने आणि फॅट्स अल्कोहोल शोषण्याचा वेग कमी करतात, ज्यामुळे हँगओव्हरचा त्रास कमी होण्यास मदत होते, असा दावा केला जातो. त्यामुळे भारतात लोक दारुसोबत शेंगदाणे खातात.
पण अर्जेन्टिनामध्ये बिअरच्या ग्लासमध्येच शेंगदाणे टाकण्याची एक अनोखी पद्धत आहे. तिथे याला एका मनोरंजनाचा भाग मानलं जातं. ग्लासमध्ये शेंगदाणे टाकल्यावर ते आपोआप वर-खाली हालचाल करू लागतात, ज्याला शेंगदाण्यांचा डान्स असे म्हटलं जातं.
'रिसर्च गेट' या वेबसाईटवरील ब्राझिलियन संशोधक लुईझ परेरा यांनी यामागचे कारण काय याची माहिती दिली आहे. शेंगदाणे हे बिअरपेक्षा वजनाने जड (जास्त घनता असलेले) असतात. त्यामुळे ग्लासमध्ये टाकल्यावर ते सुरुवातीला तळाशी जाऊन बसतात.
बिअरमध्ये असलेल्या कार्बन डायऑक्साइडचे (CO2) शेकडो लहान बुडबुडे शेंगदाण्याच्या पृष्ठभागावर जमा होऊ लागतात. शेंगदाणे हे या बुडबुड्यांसाठी 'केंद्रक' (Nuclei) म्हणून काम करतात.
हे बुडबुडे शेंगदाण्याला वर उचलतात आमि त्यामुळे शेंगदाणे वर तरंगतात. पृष्ठभागावर आल्यावर हे बुडबुडे हवेच्या संपर्कात येऊन फुटतात. बुडबुडे फुटले की शेंगदाणे पुन्हा जड होतात आणि तळाशी जातात.
पुन्हा तिथे बुडबुडे चिकटतात आणि त्यांना वर आणतात. जोपर्यंत बिअरमधील कार्बन डायऑक्साइड संपत नाही, तोपर्यंत शेंगदाण्यांचा हा डान्स सुरूच राहतो.
(डिस्क्लेमर: मद्यपान आरोग्यासाठी हानिकारक आहे. यामुळे कर्करोगासारखे गंभीर आजार होऊ शकतात. वरील माहिती केवळ सामान्य ज्ञानासाठी देण्यात आली आहे.)
