संजय राऊत, सर्वात मोठा जादूटोना करणारा तर तुझा मालक!; नितेश राणे यांचा निशाणा

सिंधुदुर्ग : भाजपचे आमदार नितेश राणे यांनी ठाकरेगटाचे नेते संजय राऊत यांच्यावर टीका केली आहे. तसंच उद्धव ठाकरे यांच्यावरही निशाणा साधला आहे. संजय राऊत सर्वात मोठा जादूटोना करणारा तुझा मालक उद्धव ठाकरे आहे, असं नितेश राणे म्हणालेत. तसंच राष्ट्रवादीचे प्रदेशाध्यक्ष जयंत पाटील यांची आज ईडी चौकशी होतेय. त्यावरही नितेश राणे बोलले आहेत.

संजय राऊत सर्वात मोठा जादूटोना करणारा तुझा मालक आहे. काळी जादू करून ठाकरेंनी काय काय केलं हे आम्हाला माहीत आहे. मातोश्रीच्या मागील भागात जेसीबीने खोदून लिंब का टाकलेली याची माहिती द्यावी का?, असं नितेश राणे यांनी म्हटलं आहे.

महाविकास आघाडीच्या जागा वाटपाबाबत बोलत असताना उद्धव ठाकरेंचे पगारी कामगार संजय राऊत यांनी नाना पटोलेंच्या अप्रत्यक्ष थोबाडीत मारलं आहे. काही दिवसांपूर्वी बिकेसीवर एक बैठक झाली. त्यात ठाकरे गट आणि राष्ट्रवादी यात ती बैठक झाली. त्यात जास्त जागा आपण घ्यायच्या आणि उरलेल्या जागा काँग्रेसला द्यायचं अस ठरलंय. काँग्रेसचा कार्यक्रम करण्याचे अटळ आहे, असं नितेश राणे म्हणालेत.

उद्धव ठाकरे, संजय राऊत आणि आदित्य ठाकरे यांचे रक्त भगवे आहे का हे पाहावं लागेल, असा टोला नितेश राणे यांनी लगावला आहे.

अजितदादा पवार यांची डीएनए टेस्ट करण्याची हिंमत संजय राऊत बोलून गेला आहे. पाकिस्तानच्या प्रेमात असलेल्या संजय राऊत आणि उद्धव ठाकरेंच्या टोळीला आमच्या पंतप्रधान नरेंद्र मोदी यांना मिळालेला मान कधी हजम होणार नाही, असंही ते म्हणालेत.

उद्धव ठाकरे मुख्यमंत्री बनणार नाहीत. तर त्यांची पत्नी मुख्यमंत्री बनू शकतात, असं एका बुवाने सांगितलं होतं. म्हणून त्यांनी रश्मी ठाकरे यांना मुख्यमंत्री करण्याची घोषणा केली होती. कर्जतच्या फार्महाऊसवर किती नर बळी दिले गेले याची माहिती घ्या.

नव्या संसंद भवनाच्या उद्घाटनावरून सध्या वाद निर्माण झाला आहे. त्यावर संसद भवनाचं उद्घाटन नरेंद्र मोदी यांनीच केलं पाहिजे. उद्धव ठाकरेंनी स्वतःच्या वडिलांचे स्मारक उभं करू शकला नाही पण मातोश्री 2 उभं केलं, असं नितेश राणे म्हणाले.

जयंत पाटील यांचे कार्यकर्ते ईडीच्या कार्यालयाबाहेर जे करत आहे, तो तमाशा आहे नौटंकी आहे, असं म्हणत नितेश राणे यांनी जयंत पाटील यांच्या ईडी चौकशीवर प्रतिक्रिया दिली आहे.