Cabinet Minister Dipak Kesarkar Profile | शिवसेना बंडखोर गटाची भक्कमपणे बाजू मांडणारे दिपक केसरकर ( Dipak Kesarkar) त्यांच्या शांत आणि संयमी बोलण्यामुळे लागलीच चर्चेत आले. मुख्यमंत्री एकनाथ शिंदे (CM Eknath Shinde) यांच्या गटाची प्रवक्ते म्हणून त्यांनी महत्त्वाची जबाबदारी सांभाळली. त्यांच्या रुपाने कोकणाला कॅबिनेट मंत्री (Cabinet Minister) मिळाला. सोन्याचा चमचा घेऊन आलेले असले तरी दिपक केसरकरांनी त्यांच्या साधेपणामुळे लोकांची मने जिंकली. उद्धव ठाकरे (Udhav Thackeray) यांच्या महाविकास आघाडीत त्यांनी गृहराज्यमंत्री म्हणून कारभार पाहिला. पण त्यांची कारकिर्द काही शिवसेनेतून सुरु झाली नाही. दीपक केसरकर हे सुशिक्षित आणि सुसंस्कृत अशा सधन कुटुंबातून आलेले आहे. सावंतवाडी मतदार संघाचे ते प्रतिनिधित्व करतात. स्वीकृत नगरसेवक ते कॅबिनेट मंत्रीपद या सर्व राजकीय प्रवासात त्यांनी मागे वळून पाहिलेच नाही. प्रत्येक राजकीय टप्प्यावर त्यांनी यशाला गवसणी घातली.
सावंतवाडी नगरपालिकेवर स्वीकृत नगरसेवक म्हणून केसरकर यांनी राजकारणात प्रवेश केला. त्यानंतर ते नगराध्यक्ष झाले. आपल्या व्यक्तिमत्वामुळे त्यांनी लोकांची मने जिंकली. सावंतवाडी मतदारसंघातून तीन वेळा निवडून येण्याची हॅट्रिक त्यांनी साधली. सेना-भाजप युती सरकारमध्ये राज्याचे गृहराज्यमंत्री म्हणून त्यांनी कारभार पाहिला. सुसंस्कृत राजकीय विचारसरणीचे राजकीय नेते निपजणे आता महाकठिण झाले आहे. आरोप-प्रत्यारोप करणारे, गलिच्छ आरोप करणारे, विखारी टीका आणि शिव्या घालणाऱ्या राजकारणात केसरकर हे कोणाला ही न दुखावण्याची भूमिका सहज घेतात आणि निभावतात, हे बंडाच्या काळात उभ्या महाराष्ट्राने पाहिले आहे. त्यांच्यावर टीका करणाऱ्यांना त्यांनी कृतीतून उत्तर दिल्याचे दिसून येते.
शिंदे गटाने महाविकास आघाडी आणि शिवसेनेत बंड केल्याने उद्धव ठाकरे यांचे सरकार अल्पमतात आले. शिंदे यांच्या नेतृत्वातील या गटाने अगोदर सुरत आणि नंतर गुवाहाटी येथे मोर्चा वळविला. त्यावेळी शिंदे गटाकडून गटाची ध्येयधोरणे, पुढील वाटचाल, रणनीती इत्यादी बाबी प्रसार माध्यमांपर्यंत पोहचवण्याचे काम केसरकर यांनी केले.
1. काँग्रेसी विचारसरणीचा पुरस्कार करत काँग्रेसमधून राजकारणाला सुरुवात
2. सावंतवाडी पालिकेतून राजकीय कारकीर्द सुरु
3. काँग्रेसमध्ये असताना राष्ट्रवादीचे नेते प्रवीण भोसलेंशी जवळीक
4. 2009 ची विधानसभा निवडणूक टर्निंग पॉईंट ठरली
5. प्रवीण भोसलेंना शह देत राष्ट्रवादीकडून सावंतवाडी विधानसभा मतदारसंघाची उमेदवारी
6. केसरकरांना आमदार म्हणून निवडून आणण्यात नारायण राणेंची महत्वाची भूमिका
7. 2014च्या विधानसभा निवडणुकीच्या ऐन तोंडावर शिवसेनेत प्रवेश
8. 2014च्या विधानसभेत शिवसेनेकडून आमदार म्हणून निवडून आले
9. 2014 च्या फडणवीस सरकारमध्ये केसरकरांवर गृहराज्यमंत्री पदासह अर्थ व वित्त विभागाची जबाबदारी
10. महाविकास आघाडी स्थापन झाल्याने शिवसेनेवर नाराज होऊन शिंदे गटात सामील
11. शिंदे-फडणवीस सरकारमध्ये कॅबिनेटपदी वर्णी