Rental Property: भाड्याच्या घराला पेंट करायचंय, पण पैसे कोण मोजणार, घरमालक की भाडेकरु? जाणून घ्या महत्वाचे नियम
Rental Property: भाड्याच्या घराला पेंट करण्याचे काय आहेत महत्त्वाचे नियम? तर घराला पेंट करायचं असेल, तर कोणीच्या खिशातून पैसे जातील? घरमालकाच्या की भाडेकरुच्या? जाणून घ्या नेमके काय आहेत नियम?
Rental Property: स्वतःचं घर असलं की, आपल्या आवडीने सजवता येतं आणि स्वतःचं घर आहे… अशी सुरक्षितता देखील असते. पण घर जर भाड्याचं असेल आणि त्या घराला पेंट करायचं असेल तर, काय नियम आहेत. याबद्दल फार कोणाला माहिती नसतं.. आता लवकरच दसरा – दिवळी येणार आहे. त्याआधी घराची स्वच्छचा झाली पाहिजे… असं अनेकांना वाटतं. पण घर भाड्याचं असेल तर, पेंट करण्यासाठी कोण पैसे देईल? हा प्रश्न उपस्थित होतो. भाडेकरूच दरवर्षी घराच्या पेंटसाठी पैसे देईल की, घर मालकाची देखील काही जबाबदारी आहे. याबद्दल सांगायचं झालं तर, घराची दुरुस्ती आणि देखभाल करण्यासाठी घरमालक आणि भाडेकरु यांच्यावर वेगळ्या जबाबदाऱ्या आहेत. पण सर्वात आधी एक गोष्ट पाहणं फार गरजेचं आहे आणि ती गोष्ट म्हणजे रेंट एग्रीमेंटवर याबद्दल काही लिहिलं आहे की नाही.
जर रेंट एग्रीमेंटद्वारे घराला पेंट आणि सफेदी करण्याची जबाबदारी भाडेकरूवर सोपवण्यात आली नसेल, तर घराच्या पेंटचा आणि सफेदीचा खर्च सामान्यतः घरमालकाची जबाबदारी मानला जातो. ‘उत्तर प्रदेश शहरी परिसर भाडेकरू नियमन कायदा, 2021 च्या दुसऱ्या अनुसूचीमध्येही भिंतींना पेंट करणं तसेच दरवाजे आणि खिडक्यांना रंगकाम करणं या गोष्टी घरमालकाच्या जबाबदारीत समाविष्ट करण्यात आल्या आहेत.
दसरा – दिवाळीत पेंट करायचं असेल तर, कोण भरणार पैसै?
असं समजा की, एखादं कुटुंब अनेक वर्षांपासून भाड्याच्या घरात राहत आहे. कालांतराने भिंतींवरील रंग फिका पडला आणि सणासुदीच्या काळात घर नवीन दिसावं यासाठी त्याला पुन्हा रंगकाम करण्याची गरज भासत आहे. जर ही झीज सामान्य वापरामुळे झाली असेल आणि भाडेकरूने भिंतींचं कोणतंही मोठं नुकसान केलं नसेल, तर पेंटचा खर्च सामान्यतः घरमालकाची जबाबदारी असतो.
कायद्यानुसार, दरवाजे आणि खिडक्यांना पेंट करण्यासारख्या कामांची जबाबदारी घरमालकाची असते, तर किरकोळ आणि दैनंदिन स्वरूपाच्या दुरुस्तीची जबाबदारी भाडेकरूची असू शकते. याबद्दल, मालमत्ता भाड्याने देताना केलेला भाडेकरार अत्यंत महत्त्वाचा असतो; कारण दुरुस्ती आणि देखभालीशी संबंधित जबाबदाऱ्या कशा असतील, हे खुद्द करारातच वेगळ्या प्रकारे निश्चित करण्याची मुभा कायद्याने दिली आहे. जर करारावर स्पष्ट लिहिलं असेल की, भाडे करार संपल्यानंतर घराला पेंट करावं लागेल, तर प्रकरण करारवर नमून असलेल्या गोष्टींनुसार होईल.
