घरात पूर्वजांचे फोटो लावताना ही चूक करू नका; अन्यथा वास्तू दोष निर्माण होऊ शकतो.
अनेकांच्या मनात घरात पूर्वजांचे फोटो लावताना बराच गोंधळ असतो. तसेच पूर्वजांचे फोटो लावताना वास्तुशास्त्राचे नियम पाळणे महत्त्वाचे असते. चुकीच्या ठिकाणी फोटो लावल्यास वास्तू दोष निर्माण होऊ शकतो, ज्यामुळे नकारात्मक ऊर्जा वाढते. त्यामुळे फोटोची दिशा आणि योग्य स्थान पाहणे फार आवश्यक असते. ती दिशा आणि स्थान कोणतं आहे हे जाणून घेऊयात.
वास्तुशास्त्र हे एक असे शास्त्र आहे जे घरापासून ते ऑफिसपर्यंत प्रत्येक जागेची ऊर्जा आपल्या गरजांनुसार कशी जुळवून घ्यायची हे शिकवते. त्याच्या तत्त्वांचे पालन करून आपण आपल्या सभोवताली सकारात्मक आणि शांत वातावरण निर्माण करू शकतो. या शास्त्राच्या तत्त्वांनुसार, रुम, स्वयंपाकघर, प्रार्थना कक्ष आणि दरवाजे यांची योग्य दिशा आणि स्थान घरात आनंद आणि समृद्धी आणते. त्यातीलच एक मत्त्वाचा भाग म्हणजे घरात लावलेले पूर्वजांचे फोटो. अनेकांच्या घरात आपण पूर्वजांचे फोटो लावलेले पाहिले असतील. पण अनेकदा काहीजण पूर्वजांचे फोटो कुठे लावावेत याबद्दल गोंधळलेले असतात. पण बऱ्याचदा चुकीच्या ठिकाणी फोटो लावले जातात ज्यामुळे वास्तूदोष निर्माण होण्याची शक्यता असते. त्यासाठी घरात पूर्वजांचे फोटो कुठे ठेवावेत किंवा लावावेत हे जाणून घेऊयात.
या ठिकाणी पूर्वजांचे फोटो लावावेत
तुम्ही अनेकदा पाहिले असेल की लोक त्यांच्या पूर्वजांचे फोटो प्रार्थना कक्षात लावतात, जे अजिबात योग्य मानले जात नाही. या ठिकाणी पूर्वजांचे फोटो लावल्याने घरात वास्तुदोष निर्माण होतात आणि अनेक प्रकारचे नुकसान होते. शास्त्रांनुसार, पूर्वजांचे फोटो चुकूनही प्रार्थना कक्षात लावू नयेत. शास्त्रांनुसार, त्यांचे फोटो नेहमी नैऋत्य दिशेला लावावेत. प्रार्थना कक्ष ईशान्य कोपऱ्यात असणे शुभ मानले जाते. त्याच वेळी, पूर्वजांचे फोटो फक्त त्याच्या विरुद्ध दिशेनेच लावता येतात. जर असे केले तर देवासोबतच, पूर्वजांचे आशीर्वाद घरातील लोकांवर नेहमीच राहतात.
पूर्वजांचा फोटो लावताना या गोष्टींची काळजी घेतली पाहिजे
पूर्वजांचा फोटो ज्या ठिकाणी लावला आहे तो परिसर नेहमीच स्वच्छ ठेवावा. फोटोची चौकट तुटलेली नाही याची विशेष काळजी घ्यावी. फोटो स्वच्छ असावा. दररोज त्या फोटोसमोर दिवा लावणे देखील महत्त्वाचे आहे. पूर्वजांचा फोटो खूप उंच किंवा खूप खाली ठेवू नये. फोटो अशा प्रकारे ठेवा की तो सरळ पाहण्यातून स्पष्टपणे दिसेल. शास्त्रानुसार, पूर्वजांचे 1 किंवा 2 पेक्षा जास्त फोटो घरात ठेवू नयेत.
( डिस्क्लेमर : वरील माहिती उपलब्ध स्रोतावरून देण्यात आली आहे. तथ्यांबद्दल आम्ही कुठलाही दावा करत नाही, अंधश्रद्धेला दुजोरा नाही)
