
मुंबई : हिंदू धर्मात स्त्री शक्तीच्या जागराला विषेश महत्त्व देण्यात आले आहे. म्हणूनच शक्तीच्या उपासनेचा सण नवरात्र वर्षातून चार वेळा साजरा करण्यात येतो. पहिली वासंतिक नवरात्र पहिल्या चैत्र महिन्यात येते , दुसरी नवरात्र आषाढ महिन्यात, तिसरी अश्विन महिन्यात म्हणजे शारदीय नवरात्री आणि चौथी नवरात्र अकराव्या महिन्यात म्हणजेच माघ महिन्यात येते . यापैकी माघ महिन्यात येणाऱ्या नवरात्रीला माघ गुप्त नवरात्र आणि आषाढ महिन्यात येणाऱ्या नवरात्रीला आषाढ गुप्त नवरात्र म्हणतात. नवरात्रीच्या नऊ दिवशी देवीच्या (Chaitra Navratri 2023) नऊ रुपांची पूजा केली जाते. या दरम्यान भक्त विधीवत देवी दुर्गाची पूजा करतात. तर काही लोकं या नऊ दिवसांदरम्यान उपवास ठेवतात. हिंदू पंचांगांनुसार, चैत्र महिन्याची सुरुवात झाली आहे. या महिन्यात चैत्र नवरात्रीचा (Chaitra Navratri) उत्सव साजरा केला जातो.
यंदा 22 मार्च 2023 बुधवार रोजी चैत्र नवरात्रीला सुरुवात होत आहे. तर 30 मार्च गुरुवार रोजी चैत्र नवरात्री समाप्त होवुन, श्रीराम नवमीला सुरुवात होत आहे. यावेळी चैत्र नवरात्रीला ग्रह आणि नक्षत्रांचा दुर्मिळ संयोग होत आहे. चैत्र नवरात्रीमध्ये शनि आणि मंगळ मकर राशीत राहतील. मकर राशीत शनि-मंगळ युती, शनीची राशी, तुमची शक्ती वाढवेल. या शिवाय या 9 दिवसांमध्ये रवि पुष्य नक्षत्र, सर्वार्थ सिद्धी योग, रवि योग देखील तयार होतील, ज्यामुळे नवरात्रीची शुभता आणखी वाढेल.
(वरील माहिती उपलब्ध स्रोतावरून देण्यात आलेली आहे. याच्या तथ्यांबद्दल आम्ही कुठलाही दावा करीत नाही, तसेच अंधश्रद्धेला दुजोरा देत नाही)