Vinayak Chaturthi : आज विनायक चतुर्थी, जाणून घ्या पुजा मुहूर्त आणि शुभ योग

मुंबई : हिंदू दिनदर्शीकेनुसार, विनायक चतुर्थी (Vinayak Chaturthi) हा सण भगवान गणेशाला समर्पित आहे. अमावास्येनंतर येणार्‍या शुक्ल पक्षातील चतुर्थीला विनायक चतुर्थी आणि पौर्णिमेनंतर येणार्‍या कृष्ण पक्षातील चतुर्थीला संकष्टी चतुर्थी म्हणतात. विनायक चतुर्थी व्रत दर महिन्याला येते. यावेळी 23 फेब्रुवारी 2023 रोजी म्हणजेच आज विनायक चतुर्थीचा सण साजरा केला जात आहे. विनायक चतुर्थीला गणेशाची पूजा करून व्रत केल्यास प्रत्येक मनोकामना पूर्ण होते. तसेच भगवान गणेश बुद्धी आणि संयम यांचा आशीर्वाद देतात. विनायक चतुर्थीच्या दिवशी, मध्यान्हकाळात दुपारी गणेश पूजन केले जाते. गणपतीची पूजा करण्याचा शुभ मुहूर्त, पूजेची पद्धत जाणून घेऊया.

विनायक चतुर्थी पूजेची वेळ

फाल्गुन, शुक्ल चतुर्थी
सुरुवात – 23 फेब्रुवारी, सकाळी 03:24 वाजता
समाप्त – फेब्रुवारी 24, 01:33 AM

गणपतीच्या पूजेची वेळ – सकाळी 11:26 ते दुपारी 01:43 पर्यंत.

विनायक चतुर्थी पूजा विधी

विनायक चतुर्थीच्या दिवशी सकाळी लवकर उठून स्नान करून सूर्यदेवाला अर्घ्य अर्पण करावे. यानंतर गणेशाची आराधना सुरू करा. या दिवसाच्या पूजेत नारळ आणि मोदक यांचा समावेश करावा. याशिवाय पूजेत गणेशाला गुलाबाचे फूल आणि दूर्वा अर्पण करा. धूप, दिवा, नैवेद्य अर्पण केल्यानंतर ‘ओम गं गणपतये नमः’ या मंत्राचा जप करावा. गणपतीची कथा वाचा, आरती करा, पूजेत सहभागी असलेल्या सर्वांना प्रसाद वाटप करा.

विनायक चतुर्थीचे महत्त्व

शास्त्रात असे वर्णन आहे की जे लोकं विघ्न दूर करणारे श्री गणेशाची नित्य पूजा करतात त्यांच्या जीवनातील सर्व संकटे संपतात. विनायक चतुर्थीला सिद्धी विनायक रूपाची पूजा केल्याने संततीशी संबंधित प्रत्येक समस्या दूर होतात. कुटुंबाच्या वाढीसाठी हे व्रत अत्यंत महत्त्वाचे मानले जाते.

विनायक चतुर्थी शुभ योग

विनायक चतुर्थीच्या निमित्ताने आज अनेक शुभ योगही बनत आहेत. सर्वार्थ सिद्धी योग दिवसभर राहील. विजय मुहूर्त दुपारी 2.28 ते 3.14 पर्यंत असेल. रवियोग सकाळी 06.52 वाजता सुरू झाला असून 24 फेब्रुवारी 2023 रोजी पहाटे 3.44 पर्यंत राहील.

(वरील माहिती उपलब्ध स्रोतावरून देण्यात आलेली आहे. याच्या तथ्यांबद्दल आम्ही कुठलाही दावा करीत नाही, तसेच अंधश्रद्धेला दुजोरा देत नाही)