SA vs NZ SF Toss : न्यूझीलंडचा दक्षिण आफ्रिकेविरुद्ध चेज करण्याचा निर्णय, दोन्ही संघांकडून बदल
South Africa vs New Zealand Semi Final Toss and Playing 11 : दक्षिण आफ्रिका आयसीसी टी 20I वर्ल्ड कप स्पर्धेत न्यूझीलंड विरुद्ध वरचढ असल्याचं आकड्यातून स्पष्ट होतं. अशात आता न्यूझीलंड या निर्णायक सामन्यात मैदान मारण्यात यशस्वी ठरणार का? हे पाहणं महत्त्वाचं ठरणार आहे.
आयसीसी टी 20I वर्ल्ड कप 2026 स्पर्धेत 52 सामन्यांनंतर उपांत्य फेरीसाठी 4 संघ निश्चित झाले. यंदा गतविजेता इंडिया, गतउपविजेता दक्षिण आफ्रिका, इंग्लंड आणि न्यूझीलंड या 4 संघांनी उपांत्य फेरीचं तिकीट मिळवलं आहे. उपांत्य फेरीतील पहिल्या सामन्यात आज 4 मार्च रोजी दक्षिण आफ्रिका विरुद्ध न्यूझीलंड आमनेसामने आहेत. हा सामना कोलकातामधील इडन गार्डन्समध्ये होणार आहे. सामन्याला संध्याकाळी 7 वाजता सुरुवात होणार आहे. त्याआधी 6 वाजून 30 मिनिटांनी टॉस झाला. न्यूझीलंडच्या बाजूने नाणेफेकीचा कौल लागला. कर्णधार मिचेल सँटनर याने फिल्डिंगचा निर्णय घेत दक्षिण आफ्रिकेविरुद्ध चेज करण्याचा निर्णय घेतला आहे. या निर्णायक सामन्यासाठी दोन्ही संघांकडून बदल करण्यात आले आहेत.
दक्षिण आफ्रिकेकडून 3 बदल
न्यूझीलंडचा मॅचविनर गोलंदाज मॅट हेन्री स्पर्धेदरम्यान मायदेशातून परतला आगहे. तर प्लेइंग ईलेव्हनमध्ये 1 बदल करण्यात आला आहे.ईश सोढी याच्या जागी जेम्स निशाम याचा समावेश करण्यात आला आहे. तर दक्षिण आफ्रिकेने तब्बल प्लेइंग ईलेव्हनमध्ये 3 बदल केले आहेत. मार्को यान्सेन, डेव्ही़ड मिलर आणि कगिसो रबाडा या तिघांचं कमबॅक झालं आहे. या तिघांना सुपर 8 मधील तिसऱ्या आणि अंतिम सामन्यात झिंबाब्वे विरुद्ध विश्रांती देण्यात आली होती.
दक्षिण आफ्रिका न्यूझीलंडवर वरचढ
टी 20i क्रिकेटच्या इतिहासात दक्षिण आफ्रिका न्यूझीलंड वरचढ असल्याचं आकडेवारीवरुन स्पष्ट होतं. उभयसंघात एकूण 19 टी 20i सामने खेळवण्यात आले आहेत. दक्षिण आफ्रिकेने 19 पैकी 12 सामन्यांत विजय मिळवला आहे. तर न्यूझीलंडने 7 सामने जिंकले आहेत.
न्यूझीलंडची सेमी फायनलमधील कामगिरी
दरम्यान न्यूझीलंडची टी 20i वर्ल्ड कप स्पर्धेतील उपांत्य फेरीत पोहचण्याची ही पाचवी वेळ ठरली आहे. न्यूझीलंडला याआधी उपांत्य फेरीतील 4 पैकी 3 सामन्यांत पराभूत व्हावं लागलं आहे. तर न्यूझीलंडने एकदाच अंतिम फेरीत धडक दिली होती.
तसेच न्यूझीलंड विरुद्ध दक्षिण आफ्रिकेची टी 20 वर्ल्ड कप स्पर्धेत आमनेसामने येण्याची ही सहावी वेळ ठरली आहे. दक्षिण आफ्रिकेने याआधीच्या पाचही सामन्यात टी 20i वर्ल्ड कप स्पर्धेत न्यूझीलंडला पराभूत केलं आहे. त्यामुळे आता दक्षिण आफ्रिका विजयी षटकार लगावणार की न्यूझीलंड विजयाचं खातं उघडणार? हे पाहणं महत्त्वाचं ठरणार आहे.
न्यूझीलंड प्लेइंग इलेव्हन : टीम सायफर्ट (विकेटकीपर), फिन लन, रचिन रवींद्र, ग्लेन फिलिप्स, मार्क चॅपमन, डॅरिल मिशेल, जेम्स निशम, मिशेल सँटनर (कर्णधार), कोल मॅककोंची, मॅट हेन्री आणि लॉकी फर्ग्युसन.
दक्षिण आफ्रिका प्लेइंग ईलेव्हन : एडेन मार्करम (कॅप्टन), क्विंटन डी कॉक (विकेटकीपर), रायन रिकेल्टन, डेवाल्ड ब्रेव्हीस, डेव्हिड मिलर, ट्रिस्टन स्टब्स, मार्को जॅनसेन, कॉर्बिन बॉश, कागिसो रबाडा, केशव महाराज आणि लुंगी एनगिडी.
