ENG vs PAK Rain : पाऊसच करणार पाकिस्तानचं काम तमाम! कसं असेल हवामान?
Pakistan Semi Final Qualification Scenario : पावसामुळे सुपर 8 फेरीतील पहिला सामना रद्द झाल्याने पाकिस्तानच्या सेमी फायनल मोहिमेला मोठा झटका लागला. त्यामुळे पाकिस्तानसाठी उर्वरित दोन्ही सामने करो या मरो असे आहेत.
पाकिस्तान क्रिकेट टीमने सलमान आघा याच्या नेतृत्वात आयसीसी टी 20i वर्ल्ड कप 2026 स्पर्धेतील साखळी फेरीत 4 पैकी 3 सामने जिंकले. पाकिस्तान टी 20i वर्ल्ड कप स्पर्धेत नेहमीप्रमाणे टीम इंडियासमोर फुस्स ठरली. तर पाकिस्तानने इतर 3 सामने जिंकत सुपर 8 मध्ये धडक दिली. सेमी फायनलमध्ये पोहचण्यासाठी सुपर 8 मधील प्रत्येक सामना अटीतटीचा आहे. अशात पाकिस्तान विरुद्ध न्यूझीलंड यांच्यातील सुपर 8 मधील पहिलाच सामना पावसामुळे रद्द झाला. त्यामुळे दोन्ही संघांना प्रत्येकी 1-1 गुण देण्यात आला. हा सामना रद्द झाल्याने पाकिस्तानच्या मिशन सेमी फायनलला मोठा झटका लागला. त्यामुळे पाकिस्तानला सुपर 8 फेरीतील उर्वरित दोन्ही सामने चांगल्या फरकाने जिंकावे लागणार आहेत.
पाकिस्तानसमोर सुपर 8 फेरीतील दुसऱ्या सामन्यात इंग्लंडचं आव्हान आहे. इंग्लंडने त्यांच्या सुपर 8 फेरीतील पहिल्याच सामन्यात श्रीलंकेवर अप्रतिम विजय मिळवला आहे. त्यामुळे इंग्लंडकडे दुसरा सामना जिंकून सेमी फायनलचा दावा मजबूत करण्याची संधी आहे. तर दुसऱ्या बाजूला न्यूझीलंड विरुद्धचा सामना रद्द झाल्याने पाकिस्तानसाठी इंग्लंड विरुद्धचा सामना हा आर या पार असा आहे. अशात हा सामना पावसामुळे रद्द झाला तर पाकिस्तानचं काहीही न करता आव्हान संपुष्टात येईल. या निमित्ताने इंग्लंड-पाकिस्तान सामन्यात हवामान कसं असेल? तसेच शेजाऱ्यांचं उपांत्य फेरीसाठी समीकरण कसं आहे? हे जाणून घेऊयात.
इंग्लंड विरुद्ध पाकिस्तान यांच्यातील सुपर 8 फेरीतील सामना हा मंगळवारी 24 फेब्रुवारीला खेळवण्यात येणार आहे. हा सामना श्रीलंकेतील पल्लेकेले आंतरराष्ट्रीय स्टेडियममध्ये खेळवण्यात येणार आहेत. पाकिस्तानच्या खात्यात 1 गुण आहे. इंग्लंड विरुद्धचा सामनाही पावसामुळे वाया गेल्यास पाकिस्तानच्या खात्यात एकूण 2 पॉइंट्स होतील. त्यामुळे इंग्लंड विरुद्धचा सामनाही वाया गेल्यास पाकिस्तानला उपांत्य फेरीत स्वत:च्या जोरावर पोहचता येणार नाही. त्यामुळे पाकिस्तानला स्वत:च्या ताकदीवर उपांत्य फेरीत पोहचायचं असेल तर इंग्लंड विरुद्ध विजय आवश्यक आहे.
हवामानाचा अंदाज काय?
चाहत्यांसाठी दिलासादायक बातमी आहे. हवामान विभागानुसार, इंग्लंड-पाकिस्तान सामन्यावर पावसाचं सावट नाहीय. सामन्यादरम्यान पाऊस होण्याची शक्यता ही 2 टक्के इतरी आहेत. तर तापमान हे जवळपास 27 अंश सेल्सियस इतके असेल. त्यामुळे 20 ओव्हरचा खेळ होण्याची शक्यता आहे.
पाकिस्तानचं सेमी फायनलचं समीकरण
पाकिस्तानने इंग्लंडला पराभूत केल्यास त्यांचे 3 पॉइंट्स होतील. तसेच पाकिस्तानने सुपर 8 फेरीतील शेवटच्या सामन्यात श्रीलंकेवर मात केल्यास 3 चे 5 गुण होतील. त्यामुळे पाकिस्तानची उपांत्य फेरीत पोहचण्याची शक्यता वाढेल. मात्र इंग्लंडने पराभूत केलं तर पाकिस्तानचं समीकरण जर तरवर असेल. त्यामुळे इंग्लंडने न्यूझीलंडला पराभूत केलं तर पाकिस्तानची आशा कायम राहिल. तसेच नेट रनरेटही निर्णायक ठरेल.
