IND vs NZ : टीम इंडिया दुसऱ्या वनडेत इतिहास रचणार?
रायपूरमधील शहीद वीर नारायण सिंह स्टेडियममध्ये टीम इंडिया विरुद्ध न्यूझीलंड यांच्यातील दुसरा एकदिवसीय सामना खेळवण्यात येणार आहे. या सामन्याला दुपारी 1 वाजून 30 मिनिटांनी सुरुवात होणार आहे.
रायपूर : टीम इंडिया विरुद्ध न्यूझीलंड यांच्यातील दुसरा एकदिवसीय सामना 21 जानेवारीला रायपूरमधील शहीद वीर नारायण सिंह स्टेडियममध्ये खेळवण्यात येणार आहे. या सामन्याला दुपारी 1 वाजून 30 मिनिटांनी सुरुवात होणार आहे. या दुसऱ्या सामन्यासाठी दोन्ही संघांनी जोरदार सराव केला आहे. तसेच टीम इंडिया या दुसऱ्या सामन्यात प्लेइंग इलेव्हनमध्ये 3 द्विशतकवीर फलंदाजांना खेळवणार आहे. स्वत: कॅप्टन रोहित शर्मा, इशान किशन आणि शुबमन गिल मैदानात दिसतील. तसेच टीम इंडिया दुसऱ्या वनडेत इतिहास रचणारी आणि वनडे क्रिकेटमध्ये अशी कामगिरी करणारी पहिलीच टीम ठरेल.
रोहित शर्माने एकिदिवसीय क्रिकेटमध्ये सर्वाधिक 3 वेळा द्विशतक ठोकण्याचा कारनामा केला आहे. याशिवाय इशान किशनने बांगलादेश विरुद्ध 2022 मध्ये द्विशतक केलं. त्यानंतर आता शुबमन गिल याने न्यूझीलंड विरुद्धच्या पहिल्या सामन्यात शानदार द्विशतक ठोकलं. यासह अनेक विक्रम आपल्या नावे केले.
क्रिकेट विश्वात आतापर्यंत कोणत्याही टीमने प्लेइंग इलेव्हनमध्ये 3 द्विशतकवीरांना एकत्र खेळवलं असेल. त्यामुळे रोहित, इशान आणि शुबमन दुसऱ्या सामन्यात खेळले तर एक खास रेकॉर्डची नोंद होईल.
पहिल्या सामन्यातील विजयानंतर कॅप्टन रोहित प्लेइंग इलेव्हनमध्ये बदल करणार नाही. मात्र पहिल्या सामन्यात मोहम्मद सिराजचा अपवाद वगळता सर्व गोलंदाजांनी निराशा केली. त्यामुळे रोहित गोलंदाजांमध्ये बदल करु शकतो. तसेच रोहितचा दुसरा सामना जिंकून मालिकाही जिंकण्याचा प्रयत्न असणार आहे. मात्र समोर न्यूझीलंडचं आव्हान आहे. त्यामुळे दुसऱ्या सामन्यात दोन्ही संघात काँटे की टक्कर पाहायला मिळणार आहे.
दुसऱ्या सामन्यासाठी टीम इंडिया संभावित प्लेइंग इलेव्हन : रोहित शर्मा (कर्णधार), शुभमन गिल, विराट कोहली, ईशान किशन, सूर्यकुमार यादव, हार्दिक पांड्या, वॉशिंगटन सुंदर, कुलदीप यादव, मोहम्मद शमी, मोहम्मद सिराज, शार्दुल ठाकुर किंवा उमरान मलिक.
