IPL 2026 : पंजाबविरुद्धच्या सामन्यापूर्वी चेन्नई सुपर किंग्सच्या गोटात आनंदाचं वातावरण, झालं असं की…

आयपीएल 2026 स्पर्धेपूर्वी चेन्नई सुपर किंग्सने संघाची मजबूत बांधणी केली होती. संजू सॅमसनला संघात घेतल्याने बाजू भक्कम झाल्याचं क्रीडाप्रेमींचं म्हणणं आहे. पण पहिल्याच सामन्यात भ्रमनिरास झाला. संजू सॅमसनची बॅट काही चालली नाही. तसेच राजस्थान रॉयल्सने चेन्नई सुपर किंग्सवर सहज विजय मिळवला. त्यामुळे चेन्नई सुपर किंग्सचा दुसऱ्या सामन्यात कस लागणार आहे. ऋषभ पंतच्या कर्णधारपद खऱ्या अर्थाने पणावर लागणार आहे. त्यात चेन्नई सुपर किंग्सचा स्टार विकेटकीपर फलंदाज महेंद्रसिंह धोनीचं मार्गदर्शन लाभणार की नाही? असा प्रश्न आहे. कारण सुरूवातीच्या तीन चार सामन्यांना मुकणार हे सांगितलं जात होतं. पण चेन्नई सुपर किंग्स आणि महेंद्रसिंह धोनीच्या चाहत्यांसाठी आनंदाची बातमी आहे. कारण पंजाब किंग्सविरुद्धच्या सामन्यापूर्वी महेंद्रसिंह धोनी नेट प्रॅक्टिस करताना दिसला. महेंद्रसिंह धोनी दुसऱ्या सामन्यापूर्वी नेट प्रॅक्टिस करत असल्याने शुभ संकेत मिळत आहेत.

दोन आठवडे धोनी खेळणार नाही!

आयपीएल स्पर्धेपूर्वी महेंद्रसिंह धोनीच्या पोटरीला दुखापत झाल्याची माहिती समोर आली. चेन्नई सुपर किंग्सने त्याच्या दुखापतीची माहिती देत सांगितलं होतं की, धोनी दुखापतग्रस्त असून दोन आठवडे खेळणार नाही. पण दुसऱ्या सामन्यापूर्वी नेट प्रॅक्टिस सुरू केल्याने क्रीडाप्रेमींच्या आशा वाढल्या आहेत. पंजाब किंग्सविरुद्धच्या सामन्यात मैदानात उतरेल की नाही? याबाबतही कोणतीही अधिकृत घोषणा करण्यात आलेली नाही. महेंद्रसिंह धोनीला संधी मिळाली तरी तो इम्पॅक्ट प्लेयर म्हणूनच असेल. कारण विकेटकीपिंगसाठी चेन्नई सुपर किंग्सकडे संजू सॅमसनचा पर्याय आहे.

आयपीएल 2025 स्पर्धेत चेन्नई सुपर किंग्सची कामगिरी निराशाजनक होती. या स्पर्धेत चेन्नई सुपर किंग्सचा संघ 10व्या स्थानावर होता. त्यामुळे यंदा नव्याने संघ बांधणी केली आहे. पण या पर्वाची सुरूवातही पराभवाने झाल्याने सीएसके चाहत्यांची धाकधूक वाढली आहे. राजस्थानविरुद्धच्या सामन्यात चेन्नई सुपर किंग्सचा संघ 127 धावा करू शकला. हे आव्हान राजस्थानने 13व्या षटकात पूर्ण केलं. आता पंजाब किंग्सविरुद्ध सामना होणार आहे. हा सामना चेन्नईचं होमग्राउंड चेपॉकवर होणार आहे. त्यामुळे या सामन्यात विजयासाठी प्रयत्न असेल.