DC vs MI : मुंबईचा मोठा निर्णय, कॅप्टन बदलला, सूर्यकुमार यादव याच्याकडे नेतृत्व

आयपीएल स्पर्धेच्या 19 व्या मोसमातील आठव्या सामन्यात दिल्ली कॅपिट्ल्स विरुद्ध मुंबई इंडियन्स आमनेसामने आहेत. या सामन्याला दुपारी 3 वाजून 30 मिनिटांनी सुरुवात होणार आहे. त्याआधी 3 वाजता टॉस झाला. होम टीम दिल्लीच्या बाजूने नाणेफेकीचा कौला लागला. कॅप्टन अक्षर पटेल याने फिल्डिंगचा निर्णय घेत मुंबईला बॅटिंगसाठी भाग पाडलं आहे. मुंबईने दिल्ली विरूद्धच्या सामन्यात कर्णधार बदलला आहे. पलटणने हार्दिक पंड्या याच्या जागी मुंबईकर सूर्यकुमार यादव याला नेतृत्वाची जबाबदारी दिली आहे.

मुंबई इंडियन्समध्ये कॅप्टनसह एकूण 3 बदल

सूर्याने टॉसनंतर प्रेझेंटेटर रवी शास्त्री यांच्यासह बोलताना हार्दिकबाबत माहिती दिली. “हार्दिकची तब्येत ठीक नाही. हार्दिक आजच्या मॅचसाठी फिट नव्हता. त्यामुळे मी त्याच्या जागी नेतृत्व करतोय”, असं सूर्याने म्हटलं. पलटणने दीपक चाहर, कॉर्बिन बॉश आणि मिचेल सँटनर या तिघांना संधी दिली आहे. तर हार्दिक पंड्या, ट्रेन्ट बोल्ट आणि अल्लाह गजनफर या तिघांना प्लेइंग ईलेव्हनमधून बाहेर व्हावं लागलं आहे. तर दिल्ली कॅपिट्ल्सने प्लेइंग ईलेव्हनमध्ये कोणताही बदल केलेला नाही.

दोन्ही संघांची कामगिरी

मुंबई आणि दिल्ली दोन्ही संघांनी आयपीएल 2026 मधील आपला पहिला सामना जिंकला आहे. मुंबईने केकेआर तर दिल्लीने लखनौवर मात केली आहे. अशात आता या दोघांपैकी कोणता संघ सलग दुसरा सामना जिंकण्यात यशस्वी ठरणार? याकडे क्रिकेट चाहत्यांची करडी नजर असणार आहे.

पॉइंट्स टेबलमध्ये दिल्ली-मुंबई कितव्या स्थानी?

दरम्यान दिल्ली आणि मुंबई पॉइंट्स टेबलमध्ये पाठोपाठ आहेत. दोन्ही संघांच्या खात्यात प्रत्येकी 2-2 गुण आहेत. मात्र मुंबईच्या तुलनेत नेट रनरेट चांगला असल्याने दिल्ली चौथ्या स्थानी आहे. तर मुंबई पाचव्या क्रमांकावर विराजमान याहे. मुंबईचा नेट रनरेट हा +0.687 असा आहे. तर दिल्लीचा एनआरआर +1.397 इतका आहे.

सूर्यादादाकडे पलटणच्या नेतृत्वाची धुरा

दिल्ली कॅपिट्ल्स प्लेइंग ईलेव्हन : केएल राहुल (विकेटकीपर), पथुम निसांका, नितीश राणा, अक्षर पटेल (कॅप्टन), ट्रिस्टन स्टब्स, डेव्हीड मिलर, विपराज निगम, लुंगी एनगिडी, कुलदीप यादव, टी नटराजन आणि मुकेश कुमार.

मुंबई इंडियन्स प्लेइंग ईलेव्हन : रोहित शर्मा, रायन रिकेल्टन (डब्ल्यू), तिलक वर्मा, सूर्यकुमार यादव (कर्णधार), नमन धीर, शेरफेन रदरफोर्ड, मिचेल सँटनर, कॉर्बिन बॉश, शार्दुल ठाकूर, दीपक चहर आणि जसप्रीत बुमराह.