KKR vs SRH : ब्लेसिंग-अनुकूलची कमाल, हैदराबादला 7 रन्समध्ये 3 झटके, केकेआरचं कडक कमबॅक

सनरायजर्स हैदराबादने आयपीएल स्पर्धेच्या 19 व्या मोसमातील सहाव्या आणि आपल्या दुसऱ्या सामन्यात होम टीम कोलकाता नाईट रायडर्स विरुद्ध आक्रमक सुरुवात केली. केकेआर कॅप्टन अजिंक्य रहाणे याने नाणेफेक जिंकून सनरायजर्स हैदराबादला बॅटिंगसाठी भाग पाडलं. हैदराबादच्या अभिषेक शर्मा आणि ट्रेव्हीस हेड या सलामी जोडीने या संधीचा चांगला फायदा घेत पावरप्लेमध्ये तडाखेदार बॅटिंग केली. हेड आणि शर्माने पावरप्लेच्या पहिल्या 6 ओव्हरचा पूर्ण फायदा घेत हैदराबादला आक्रमक सुरुवात करुन दिली आणि मोठ्या धावसंख्येचा पाया रचला.

हेड-शर्मा सलामी जोडीचा तडाखा

हेड आणि शर्मा या दोघांनी 5.3 ओव्हरमध्ये 82 धावा जोडल्या. ही जोडीने केकेआरसाठी डोकेदुखी ठरत होती. अशात कार्तिक त्यागी याने ही सेट जोडी फोडली. कार्तिकने सहाव्या ओव्हरमधील तिसऱ्या बॉलवर हेडला कॅमरुन ग्रीन याच्या हाती कॅच आऊट केलं. हेडने 21 बॉलमध्ये 219.05 च्या स्ट्राईक रेटने 46 रन्स केल्या आणि आपली भूमिका चोखपणे पार पाडली. हेडने या खेळीत 3 षटकार आणि 6 चौकार लगावले.

त्यानंतर अभिषेक आणि कॅप्टन इशान किशन या दोघांनी धावांचा वेग कायम ठेवण्याचा प्रयत्न केला. या जोडीने जम बसवला. मात्र त्यानंतर केकेआरच्या गोलंदाजांनी कमाल केली. झिंबाब्वेच्या ब्लेसिंग मुझरबानी एकाच ओव्हरमध्ये हैदराबादच्या 2 सेट फलंदाजांना मैदानाबाहेरचा रस्ता दाखवला. तर अनुकूल रॉय याने 1 विकेट मिळवत हैदराबादच्या धावा रोखण्याचा प्रयत्न केला.

केकेआरने हैदराबादला अवघ्या 7 बॉलमध्ये 3 झटके दिले. त्यामुळे हैदराबादची स्थिती 111-1 वरुन 118-4 अशी झाली. त्यामुळे केकेआरचे गोलंदाज इथून पुढे हैदराबादवर पकड कायम ठेवण्यात यशस्वी ठरणार का? हे डाव आटोपल्यानंतरच स्पष्ट होईल.

ब्लेसिंगकडून एकाच ओव्हरमध्ये दोघांचा गेम

ब्लेसिंगने नवव्या ओव्हरमध्ये इशान किशन आणि त्यानंतर अभिषेक शर्मा या विस्फोटक फलंदाजांना आऊट करत मैदानाबाहेरचा रस्ता दाखवला. ब्लेसिंगने दुसऱ्या बॉलवर इशान किशन याला उपकर्णधार रिंकु सिंह याच्या हाती सीमारेषेवर झेलबाद केलं. त्यानंतर ब्लेसिंगने चौथ्या बॉलवर अभिषेकला वरुण चक्रवर्ती याच्या हाती कॅच आऊट केलं. इशानने 14 तर अभिषेकने 48 धावांची खेळी केली.

त्यानंतर दहाव्या ओव्हरमध्ये अनुकूल रॉय याने अनिकेत वर्मा याला रिंकुच्या हाती 1 रनवर कॅच आऊट केलं. त्यामुळे हैदराबादची 9.2 ओव्हरमध्ये 4 आऊट 118 असा स्कोअर झाला. आता हैदराबाद इथून किती धावा जोडण्यात यशस्वी ठरते हे पाहणं महत्त्वाचं ठरणार आहे.