PSG सारखं RCB ही सलग दुसऱ्यांदा जेतेपदाला गवसणी घालणार? चॅम्पियन्स लीगनंतर आता आयपीएलकडे नजरा
आयपीएल 2026 स्पर्धेच्या अंतिम फेरीसाठी अवघ्या काही तासांचा अवधी शिल्लक आहे. या स्पर्धेत जेतेपद कोण मिळवणार याबाबत उत्सुकता आहे. पण आरसीबीच्या जेतेपदाचा एक योग जुळून आला आहे. याचं थेट नातं चॅम्पियन लीग स्पर्धेशी जोडलं जात आहे.
PSG Win UEFA Champions League 2026: क्रीडाजगतात जेतेपदाचा मान पहिल्यांदा मिळवल्यानंतर दुसऱ्यांदा ही कामगिरी पुन्हा करणं कठीण असतं. त्यामुळे सलग जेतेपद मिळवणाऱ्या संघाकडे चॅम्पियन म्हणून पाहिलं जातं. इतकंच काय तर गजविजेत्या संघाने पुन्हा जेतेपदाला गवसणी घातली तर आनंद द्विगुणित होतो. असंच काहीसं फुटबॉल लीग स्पर्धेत पाहायला मिळालं. पॅरिस सेंट जर्मनने (पीएसजी) हा कारनामा केला आहे. बुडापेस्टच्या पुस्तकास एरेना येथे अंतिम फेरीचा सामना खेळला गेला. या सामन्यात पीएसजी आणि आर्सेनल हे दोन संघ आमनेसामने आले होते. या सामन्यात पीएसजीने पेनल्टी शूटआऊटमध्ये आर्सेनलला 4-3 ने पराभूत केलं. यासह सलग दुसऱ्यांदा युईएफए चॅम्पियन्स लीग स्पर्धेच्या जेतेपदावर नाव कोरलं. पीएसजी इतिहासही आरसीबीसारखाच होता. गेल्या अनेक वर्षांपासून जेतेपदापासून दूर होते . मात्र मागच्या पर्वात जेतेपदाला गवसणी घातली होती. तसेच यंदाही जेतेपद मिळवलं आहे.
पॅरिस सेंट-जर्मेन हा युरोपमधील सर्वात बलाढ्य फुटबॉल संघांपैकी एक असूनही त्यांना त्यांची पहिली चॅम्पियन्स लीग ट्रॉफी जिंकण्यासाठी 55 वर्षे लागली. पीएसजीने सलग दुसऱ्यांदा जेतेपद मिळवल्यानंतर तशाच कामगिरीची अपेक्षा आता आरसीबीकडून आहे. मागच्या पर्वात आरसीबीने आयपीएलचं जेतेपद पहिल्यांदा मिळवलं होतं. तसेच दुसऱ्यांदा अंतिम फेरी गाठली आहे. आरसीबीचा अंतिम फेरीचा सामना गुजरात टायटन्सशी होणार आहे. आता रजत पाटीदारच्या नेतृत्वात आरसीबी संघ जेतेपदाला गवसणी घालणार का? हा प्रश्न आहे. आरसीबीला सलग दुसऱ्यांदा जेतेपद मिळवण्याची संधी आहे. आयपीएल 2026 स्पर्धेत आरसीबीची कामगिरी जबरदस्त राहिली आहे. यंदाच्या पर्वात गुणतालिकेत पहिलं स्थान गाठलं होतं. तसेच क्वॉलिफायर 1 मध्ये गुजरात टायटन्सला पराभूत केलं होतं. त्यामुळे विजयाची अपे७ा अधिक आहे.
रॉयल चॅलेंजर्स बंगळुरूला चॅम्पियन बनण्यासाठी 18 वर्षे लागली. त्यांनी आयपीएल 2025 च्या अंतिम सामन्यात पंजाब किंग्सला पराभूत करून पहिल्यांदाच विजेतेपद पटकावले. आयपीएल स्पर्धेच्या इतिहासात सलग दोन वेळा जेतेपद मिळवण्याची संधी आहे. यापूर्वी ही किमया चेन्नई सुपर किंग्स आणि मुंबई इंडियन्स संघाने केली आहे. आता आरसीबीकडे हा कित्ता गिरवण्याची संधी चालून आली आहे. आरसीबीने हा किताब जिंकला तर मुंबई इंडियन्स आणि चेन्नई सुपर किंग्ससोबत सलग दोन वेळा जेतेपद मिळवणाऱ्या संघांच्या पंगतीत बसेल.
