Womens T20 World Cup : दक्षिण अफ्रिकेची अंतिम फेरीत धडक, ऑस्ट्रेलियाचा हिशेब केला चुकता
वुमन्स टी20 वर्ल्डकप 2024 स्पर्धेत बलाढ्य ऑस्ट्रेलियाला पराभूत करत दक्षिण अफ्रिकेने अंतिम फेरीत धडक मारली आहे. ऑस्ट्रेलियाने दक्षिण अफ्रिकेसमोर विजयासाठी 135 धावांचं आव्हान दिलं होतं. हे आव्हान दक्षिण अफ्रिकेने 1 गडी गमवून पूर्ण केलं. तसेच या स्पर्धेतील मोठी उलटफेर करत अंतिम सलग दुसऱ्यांदा एन्ट्री मारली आहे.
वुमन्स टी20 वर्ल्डकप स्पर्धेतील बलाढ्य ऑस्ट्रेलियाचं आव्हान दक्षिण अफ्रिकेने मोडून काढलं आहे. मागच्या पर्वात अंतिम फेरीत ऑस्ट्रेलियाने दक्षिण अफ्रिकेचा पराभव केला होता. त्या पराभवाचा वचपा काढण्यात दक्षिण अफ्रिकेला यश आलं आहे. ऑस्ट्रेलियाने साखळी फेरीत चार पैकी चार सामने जिंकत उपांत्य फेरी गाठली होती. मात्र ऑस्ट्रेलियाचा विजयरथ बाद फेरीत दक्षिण अफ्रिकेने रोखला. त्यामुळे सातव्यांदा जेतेपदाचं ऑस्ट्रेलियाचं स्वप्न भंगलं आहे. आता न्यूझीलंड वेस्ट इंडिज यांच्यात दुसरा उपांत्य फेरीचा सामना होणार आहे. या सामन्यातील विजेत्या संघाशी अंतिम फेरीत दक्षिण अफ्रिका लढणार आहे. उपांत्य फेरीच्या सामन्यात दक्षिण अफ्रिकेने नाणेफेकीचा कौल जिंकून प्रथम क्षेत्ररक्षण करण्याचा निर्णय घेतला. ऑस्ट्रेलियाने 20 षटकात 5 गडी गमवून 134 धावा केल्या आणि विजयासाठी 135 धावांचं आव्हान दिलं. हे आव्हान दक्षिण अफ्रिकेने 17.2 षटकात 2 गडी गमवून पूर्ण केलं.
या धावांचा पाठलाग करताना लॉरा वॉल्ववॉर्ड्ट आणि तझमीन ब्रिट्स जोडीने सावध सुरुवात केली. पहिल्या विकेटसाठी 25 धावा जोडल्या. पण एनाबेल सुथरलँडच्या गोलंदाजीवर तझमीन ब्रिट्सचा त्रिफळा उडला आणि 15 धावांवर डाव आटोपला. पण त्यानंतर आलेल्या अनेके बॉशने ऑस्ट्रेलियन गोलंदाजांची धुलाई केली. अनेके बॉशने 31 चेंडूत आपलं अर्धशतक पूर्ण केलं. ही जोडी लवकर फोडण्यात ऑस्ट्रेलियाच्या गोलंदाजांना अपयश आलं. लॉराने 37 चेंडूत 42 धावा केल्या आणि बाद झाली. तिथपर्यंत सामना विजयी दृष्टीक्षेपात आला होता. दुसऱ्या विकेटसाठी दोघांनी 96 धावांची भागीदारी केली. अनेके बॉशने 48 चेंडूत नाबाद 74 धावांची खेळी केली. या खेळीत तिने 8 चौकार आणि 1 षटकार मारला.
ऑस्ट्रेलियाचा डाव
ऑस्ट्रेलियाला दुसऱ्या षटकात धक्का बसला. ग्रेस हॅरिस 3 धावांवर असताना बाद झाली. त्यानंतर जॉर्जिया वारेहमही काही खास करू शकली नाही. 5 धावा करून तंबूत परतली. त्यानंतर बेथ मूनी आणि तहिला मॅकग्राथ या जोडीने डाव सावरला. दोघांनी मिळून 50 धावांची भागीदारी केली. तहिला 27 धावा करून बाद झाली. त्यानंतर एलिसा पेरी ही बेथ मूनीच्या जोडीला आली. तिने आक्रमक खेळी केली. 23 चेंडूत 2 चौकार मारत 31 धावा केल्या. तर बेथ मूनी 44 धावा करून बाद झाली. तर तीन चौकारांसाह फोइबे लिचफिल्डने 9 चेंडूत 16 धावा केल्या.
