तू माझ्यापेक्षा जास्त कमावते..! पत्नी एलिसा हीलीने मुलाखत घेत असताना मिचेल स्टार्क असं का म्हणाला?
Alyssa Healy interviews Mitchell Starc: ऑस्ट्रेलिया आणि बांग्लादेश यांच्यात कसोटी मालिकेतील दुसरा सामना सुरू आहे. या सामन्याच्या पहिल्याच दिवशी धडाधड विकेट पडल्या. या सामन्यात लंच ब्रेकमध्ये मिचेल स्टार्कची पत्नी एलिसा हीलीने त्याची मुलाखत घेतली.
ऑस्ट्रेलिया आणि बांग्लादेश यांच्यात दुसरा कसोटी सामना सुरू असून पहिल्या दिवसावर कांगारूंनी मजबूत पकड मिळवली आहे. ऑस्ट्रेलियाचा वेगवान गोलंदाज मिचेल स्टार्क याने आपल्या भेदक गोलंदाजीने बांग्लादेश संघाची दाणादाण उडवून दिली. फक्त 22 चेंडूत 5 विकेट काढल्या आणि बांग्लादेश संघाची टॉप ऑर्डर तंबूत पाठवली. त्यामुळे मिचेल स्टार्कची दहशत बांगलादेशी फलंदाजांमध्ये होती. असं असताना या स्पेलनंतर लंच ब्रेक झाला आणि एक मजेशीर क्षण क्रीडाप्रेमींना अनुभवता आला. ऑस्ट्रेलियन महिला संघाची माजी कर्णधार एलिसा हीली हिने पती मिचेल स्टार्कची मैदानावरच मुलाखत घेतली. यावेळी दोघांची थट्टा मस्करी पाहायला मिळाली. मजेशीर प्रश्न आणि उत्तरांचा तास रंगला होता. त्यामुळे ही मुलाखत सोशल मीडियावर चांगलीच चर्चेत राहिली आहे.
रात्रीच्या जेवणाचं बिल आणि पगारावरून मजेशीर वार्तालाप
एलिसा हीलीने विचारलं की, सर्वप्रथम तुझं अभिनंदन. नाणेफेक जिंकून प्रथम गोलंदाजी करण्याचा निर्णय आणि दोन्ही संघांकडून तुम्हाला हीच अपेक्षा होती का? मिचेल स्टार्कने उत्तर दिलं की, ‘तु्म्ही हे आधीही सांगितलं होतं. तुम्ही आमच्यातील बहुतांश खेळाडूंच्या तुलनेत अधिक खेळल्या आहेत. मागच्या आठवड्यात डार्विनमध्ये आम्ही चांगली कामगिरी करू शकलो नव्हतो. पण या खेळपट्टीवर पहिल्यांदा गोलंदाजी करून फायदा घेणं गरजेचं होतं. क्वींसलँडच्या सहकारी खेळाडूंचं म्हणणं होतं की, ही खेळपट्टी गाबासारखी उसळी आणि गती देत आहे. पहिल्या सत्रात सहा विकेट काढणं जबरदस्त होतं. यासारख्या आनंदाची बाब नाही.’ बांगलादेशचा संघ पहिल्या डावात 34 षटकं खेळला आणि 64 धावांवर सर्वबाद झाला. मिचेल स्टार्कने या सामन्यात 6 विकेट काढल्या. तर पॅट कमिन्सने 3 आणि जोश हेझलवूडने एक विकेट काढली.
View this post on Instagram
एलिसा हीली म्हणाली की, या सामन्याचं चित्र असं असेल असा कोणी विचार केला नसेल? काल रात्री जेवणाचे पैसे मी भरले होते. तर आज रात्री तू पैसे भरणार असा अर्थ काढायचा का? त्यावर मिचेल स्टार्कने मिश्किलपणे उत्तर देताना हसला आणि सांगितलं की, तू माझ्यापेक्षा जास्त पैसे कमवते. हो की नाही? दोन्ही क्रिकेटपटूंची ही मुलाखत सध्या चर्चेचा विषय आहे. त्यांच्या मुलाखतीचा व्हीडिओ सोशल मीडियावर वेगाने व्हायरल होत आहे. दरम्यान, पहिल्या दिवसाचा खेळ संपला तेव्हा ऑस्ट्रेलियाने 8 गडी गमवून 165 धावा केल्या आहे. ऑस्ट्रेलियाकडे पहिल्या डावात 101 धावांची आघाडी आहे.
