IND vs NZ: ‘आधी तिथे दम दाखवं मग टीममध्ये ये’, हार्दिक पंड्याच्या कमबॅकवर शुबमन गिलची एकदम स्पष्ट भूमिका

Shubman Gill IND vs NZ ODI: भारत आणि न्यूझीलंड यांच्यातील पाच एकदिवसीय सामन्यांची मालिका ४ नोव्हेंबरपासून सुरू होत आहे. या मालिकेत एकूण पाच सामने रंगणार आहे. टी-२० मालिका जिंकल्यानंतर आता वनडे मालिका जिंकण्यावरही भारतीय संघाचे लक्ष्य असणार आहे.  भारतीय संघ २०२७ च्या एकदिवसीय विश्वचषकाची तयारी करत आहे आणि हार्दिकसारख्या अष्टपैलू खेळाडूची अनुपस्थिती संघासाठी एक मोठा धक्का आहे. हार्दिकबद्दल आता कर्णधार गिलने एक विधान केले आहे.

हार्दिक शेवटचा स्पर्धात्मक क्रिकेट सामना मे महिन्यात आयपीएल २०२६ मध्ये खेळला होता. तो सध्या बीसीसीआयच्या सेंटर ऑफ एक्सलन्समध्ये (CoE) पुनर्वसन उपचार घेत आहे. हार्दिकचे महत्त्व अधोरेखित करताना गिल म्हणाला की, “जगात त्याच्यासारखी कौशल्ये असलेले फार कमी खेळाडू आहेत. तो नवीन आणि जुन्या दोन्ही चेंडूंनी गोलंदाजी करू शकतो. भारतीय एकदिवसीय संघात सातव्या किंवा आठव्या क्रमांकावर फलंदाजी करताना शेवटच्या षटकांमध्ये जलद धावा करणे ही त्याची भूमिका असते.”

गिल म्हणाला, “हार्दिक पांड्या एक महान अष्टपैलू खेळाडू आहे. जगात फार कमी खेळाडूंकडे त्याच्यासारखी कौशल्ये आहेत. एक गोलंदाज म्हणून, तुम्ही त्याचा खेळाच्या वेगवेगळ्या टप्प्यांवर उपयोग करू शकता. तो नवीन आणि जुन्या दोन्ही चेंडूंनी गोलंदाजी करू शकतो. आम्ही त्याच्याशी अनेक वेळा बोललो आहोत. दुखापतींच्या बाबतीत त्याचे नशीब फारसे चांगले राहिलेले नाही. आयपीएलनंतर तो क्रिकेट खेळलेला नाही. तो लवकरच परत येईल अशी अपेक्षा आहे. तो काही देशांतर्गत क्रिकेट खेळेल आणि आशा आहे की लवकरच भारतीय संघात परत येईल.”

हार्दिकच्या फिटनेसच्या समस्या आयपीएल २०२६ दरम्यान सुरू झाल्या. पाठीच्या स्नायूंच्या दुखण्यामुळे तो मुंबई इंडियन्सचे तीन सामने खेळू शकला नाही. स्पर्धेच्या उत्तरार्धात त्याने पुनरागमन केले, परंतु २४ मे रोजी शेवटचा स्पर्धात्मक सामना खेळल्यापासून तो मैदानाबाहेर आहे.

जूनमध्ये पुनर्वसनादरम्यान, त्याच्या मांडीच्या स्नायूंना दुखापत झाली, ज्यामुळे तो अफगाणिस्तानविरुद्धच्या एकदिवसीय मालिकेतून बाहेर पडला. त्यानंतर, पूर्ण तंदुरुस्तीअभावी तो इंग्लंडविरुद्धची एकदिवसीय मालिका खेळू शकला नाही. आता गिलच्या मते जर त्याला भारतीय संघात पुनरागमन करायचे असेल तर त्याला देशांतर्गत सामन्यात खेळावे लागेल.