IND vs PAK: टीम इंडियानं ट्रॉफी उचलली अन् जे म्हटलं ते ऐकून पाकला मिर्च्या झोंबल्या असणार, सेलिब्रेशनचा Video पाहाच
IND vs PAK U19 Mens Asia Cup Final: भारत पाकिस्तान यांच्यात अंडर १९ आशिया कपमधील सामना रंगला जो सामना भारतीय संघाने जिंकला. आधीच पाकिस्तानला पराभवाचा धक्का होता त्यात भारतीय संघाने सेलिब्रेशनवेळी जे म्हटलं ते ऐकून पाकच्या खेळाडूंची खूपच जिरली असणार.
IND vs PAK Final Match: शनिवारी ओमानमधील अल अमेरत क्रिकेट मैदानावर खेळल्या गेलेल्या १९ वर्षांखालील आशिया कप २०२६ च्या अंतिम सामन्यात पाकिस्तानला पराभव केला. शेवटच्या चेंडूवर एका विकेटने पराभूत केल्यानंतर भारतीय युवा ब्रिगेडचा जल्लोष पाहण्यासारखा होता. पराभवाच्या धक्क्यातून आधीच सावरत असलेल्या पाकिस्तानी संघाच्या दुःखात आणखी भर पडली, जेव्हा ट्रॉफी उचलल्यानंतर लगेचच भारतीय खेळाडूंनी मैदानाच्या मध्यभागी जे म्हटले ते ऐकल्यानंतर पाकिस्तानला मिर्च्या झोंबल्या असतील.
सामन्यानंतर झालेल्या पारितोषिक वितरण समारंभात भारतीय कर्णधार लक्ष्य रायचंदानीने चॅम्पियनशिप ट्रॉफी उचलताच, संपूर्ण स्टेडियम आनंदाने दुमदुमले. लक्ष्यने ट्रॉफी आपल्या सहकाऱ्यांकडे सुपूर्द केली, त्यानंतर संपूर्ण संघाने एकत्र येऊन ‘भारत माता की जय’चा जयघोष करत आपला ऐतिहासिक विजय साजरा केला. या जल्लोषाचा आणखी एक मजेशीर व्हिडिओ समोर आला आहे, ज्यामुळे पाकिस्तानच्या जखमेवर मीठ चोळले गेले आहे. या व्हिडिओमध्ये, भारताच्या विजयाचे नायक मोहित उल्वा आणि सी. व्यंकट, विजयाच्या जल्लोषात पाकिस्तानी खेळाडूंना चिडवताना दिसत आहेत. मात्र, परिस्थिती अधिक चिघळू नये म्हणून, टीम इंडियाच्या सपोर्ट स्टाफच्या सदस्यांनी तात्काळ घटनास्थळी पोहोचून त्या दोन तरुण खेळाडूंना शांत केले आणि त्यांना तेथून घेऊन गेले.
प्रथम फलंदाजी करताना पाकिस्तानने उस्मान खान (१०७), अब्दुल कादिर (५४ चेंडूंत ८० धावा) आणि कर्णधार फरहान युसूफ (६३) यांच्या खेळीच्या जोरावर ५० षटकांत ९ गडी गमावून ३३७ धावांचा डोंगर उभा केला. भारताकडून काव्य पटेलने चार आणि सी. व्यंकटने तीन बळी घेतले.
३३८ धावांच्या आव्हानात्मक लक्ष्याचा पाठलाग करताना, आर्यवीर सेहवाग (५८) आणि कर्णधार लक्ष्य रायचंदानी (८०) यांनी ९५ धावांची भागीदारी करून भारताला दमदार सुरुवात करून दिली. मात्र, मधल्या फळीतील फलंदाज झटपट बाद झाल्याने आणि आठ गडी गमावल्याने भारत अडचणीत सापडला. त्यानंतर मनाल चौहान (३२ चेंडूंत ४७ धावा) आणि मोहित उल्वा (२६ चेंडूंत नाबाद ४९ धावा) यांनी नवव्या विकेटसाठी ५७ धावांची भागीदारी करून सामन्याचे चित्र पालटले. मनाल बाद झाल्यानंतर, मोहितने ११ व्या क्रमांकावरील फलंदाज सी. व्यंकट (८ चेंडूंत नाबाद ११ धावा) याच्या साथीने सूत्रे हाती घेतली आणि शेवटच्या चेंडूवर लॉन्ग-ऑफवरून चौकार मारून तीन धावांची पिछाडी भरून काढली.
