येत्या नवीन वर्षात रिचार्ज प्लॅन 20% टक्क्यांपर्यंत होणार महाग, जाणून घ्या प्लॅनबद्दल
2026 मध्ये टेलिकॉम टॅरिफ वाढीसाठी तयारी आधीच सुरू झाली आहे. तर आता येत्या नवीन वर्षात रिचार्ज प्लॅनच्या किमतीत वाढ होणार आहे. चला तर मग आजच्या लेखात आपण कोणत्या टेलिकॉम कंपन्यांचे रिचार्ज प्लॅन महाग झाले आहेत ते जाणून घेऊयात...
देशभरातील मोबाईल वापरकर्त्यांच्या खिशाला येत्या नवीन वर्षात कात्री बसणार आहे. कारण 2026 मध्ये मोबाईल रिचार्ज प्लॅन पुन्हा एकदा महाग होऊ शकतात. रिपोर्ट्सनुसार, रिलायन्स जिओ, एअरटेल आणि व्होडाफोन आयडिया त्यांच्या प्रीपेड आणि पोस्टपेड प्लॅनच्या किमती 20 टक्क्यांपर्यंत वाढवू शकतात. अनेक निवडक प्लॅनमधील टॅरिफ वाढीची माहिती कंपन्यांच्या अधिकाऱ्यांना सादर करण्यात आली आहे. गेल्या महिन्याभरापासून टेलिकॉम कंपन्या त्यांच्या प्लॅनमध्ये सुधारणा करत आहेत. याचा थेट परिणाम सामान्य वापरकर्त्यांना होणार आहे. विशेषतः 5जी वापरणाऱ्यांच्या खिशावर परिणाम होणार आहे. जर आपण पाहिले तर या टेलिकॉम कंपन्यानी शेवटची टॅरिफ वाढ जुलै 2023 मध्ये केली होती.
2026 मध्ये मोबाईल रिचार्जच्या किमती का वाढतील?
मॉर्गन स्टॅनली या संशोधन संस्थेच्या अहवालानुसार, भारतीय दूरसंचार कंपन्या 2026 मध्ये त्यांचे दर 16 ते 20 टक्क्यांनी वाढवू शकतात. याचा उद्देश कंपन्यांचा प्रति वापरकर्ता सरासरी महसूल (ARPU) वाढवणे आहे. शेवटचा दर वाढ जुलै 2024 मध्ये झाला होता आणि आता दोन वर्षांनंतर किमती पुन्हा वाढणार आहेत.
एअरटेल आणि जिओचे प्लॅन किती महाग होणार?
X वर वापरकर्ता क्रांती कुमार यांनी शेअर केलेल्या अंदाजानुसार, एअरटेलचा 28 दिवसांचा अमर्यादित ५G प्लॅन 319 रुपयांवरून 419 रुपयांपर्यंत वाढू शकतो. दरम्यान जिओचा 299 रुपयांचा 1.5 जीबी दैनिक डेटा असलेला प्लॅन 359 रुपयांपर्यंत पोहोचू शकतो. शिवाय 349 रुपयांचा 28 दिवसांचा 5G प्लॅन 429 रुपयांपर्यंत वाढू शकतो. याचा अर्थ वापरकर्त्यांना दरमहा 80 ते 100 रुपये जास्त खर्च करावे लागू शकतात.
महागाईचा फटका Vi योजनांनाही बसेल
व्होडाफोन आयडिया वापरकर्त्यांनाही कोणताही दिलासा मिळणार नाही. अहवालानुसार Vi चा 28 दिवसांचा 1GB दैनिक डेटा प्लॅन 340 रुपयांवरून 419 रुपयांपर्यंत वाढू शकतो. तर 56 दिवसांच्या वैधतेसह 2GB दैनिक डेटा प्लॅन 579 रुपयांवरून 699 रुपयांपर्यंत वाढू शकतो. यावरून स्पष्ट होते की Vi च्या मध्यम श्रेणीच्या प्लॅनवरही या दरवाढीचा पूर्णपणे परिणाम होईल.
थेट किंमत नाही, अशा प्रकारे जास्त पैसे आकारले जातात
टेलिकॉम कंपन्या नेहमीच प्लॅनच्या किमती थेट वाढवत नाहीत. कधीकधी त्या प्लॅनची वैधता कमी करतात किंवा देण्यात येणारे फायदे कमी करतात. अलीकडेच, जिओ, एअरटेल, व्हीआय आणि अगदी बीएसएनएलने त्यांच्या अनेक प्रीपेड प्लॅनची वैधता आणि फायदे बदलले आहेत. यामुळे वापरकर्त्यांना तेच फायदे मिळविण्यासाठी वारंवार रिचार्ज करावे लागत आहे, ज्यामुळे त्यांचा एकूण खर्च वाढतो.
