Viral News: एक्स-गर्लफ्रेंड सिंगल आहे की दुसऱ्याला डेट करतेय? उत्तर शोधण्यासाठी तरुणाने एक-दोन नव्हे, तब्बल ‘इतके’ आरटीआय अर्ज केले
Ex-Girlfriend 97 RTI Applications: तरुण प्रेमात पडला. ब्रेकअप झालं. पण एक्सला विसरू शकला नाही. तिच्याबद्दल जाणून घेण्यासाठी 97 RTI अर्ज दाखल केले.
तामिळनाडूमधून एक धक्कादायक बातमी समोर आली आहे. एका व्यक्तीने आपल्या माजी कॉलेज प्रेयसीबद्दल माहिती मिळवण्यासाठी माहिती अधिकाराचा अर्ज दाखल केला आहे. सर्वात आश्चर्यकारक गोष्ट म्हणजे, हा व्यक्ती बऱ्याच काळापासून माहितीसाठी अर्ज करत आहे. त्याने केवळ एक-दोन नव्हे, तर तब्बल 97 आरटीआय अर्ज दाखल केले आहेत. तामिळनाडू माहिती आयोगाने या प्रकरणी त्या व्यक्तीने दाखल केलेले सर्व 97 आरटीआय अर्ज फेटाळले आहेत.
आरटीआय आयुक्तांनी विल्लुपुरम येथील रहिवासी ए. संतोष यांना असा इशाराही दिला आहे की, जर त्यांनी अशा बेपर्वाईने आरटीआय अर्ज दाखल करणे सुरू ठेवले, तर त्यांना वैद्यकीय समुपदेशनासाठी पाठवले जाऊ शकते. अर्जदार ए. संतोष यांनी त्यांच्या 97 आरटीआय अर्जांमध्ये त्यांच्या पूर्वीच्या प्रेयसींसंबंधी एकूण 1887 प्रश्न विचारले होते.
ए. संतोष यांनी विचारलेल्या प्रश्नांमध्ये, त्यांची पूर्वीची कॉलेज प्रेयसी अजून जिवंत आहे का, तिचे लग्न झाले आहे का, ती कुठे राहते व काम करते आणि तिचे किती पुरुषांशी संबंध होते, यांसारख्या प्रश्नांचा समावेश होता. याव्यतिरिक्त, ए. संतोषने त्याच्या माजी प्रेयसीचे फोटो आणि विशिष्ट तारखांचे सीसीटीव्ही फुटेजदेखील मागितले. या प्रकरणात जेव्हा कारवाई करण्यात आली, तेव्हा माहिती आयोगाला अर्जदार संतोष विरुद्ध छळ आणि शोषणाची तक्रार, तसेच महिलेच्या आत्महत्येच्या प्रयत्नाची माहिती मिळाली.
कुड्डालोर जिल्ह्याचे अतिरिक्त पोलीस अधीक्षक (एएसपी), जे जन माहिती अधिकारी (पीआयओ) होते, त्यांनी सांगितले की, 2024 मध्ये संतोषचे त्याच्या कॉलेजमधील एका बॅचमेटसोबत प्रेमसंबंध होते. कॉलेज संपल्यानंतर त्यांचे नाते संपुष्टात आले. ब्रेकअपनंतरही संतोष फोन कॉल आणि सोशल मीडियाद्वारे त्या महिलेच्या संपर्कात होता.
पोलिसांनी आयोगाला कळवले की, संतोषचे वर्तन छळवणुकीच्या स्वरूपाचे होते आणि त्या महिलेने जून 2025 मध्ये आत्महत्येचा प्रयत्नही केला होता. त्यानंतर तिला उपचारासाठी सरकारी रुग्णालयात दाखल करण्यात आले. त्या महिलेने संतोषविरुद्ध छळ आणि शोषणाची तक्रार पोलिसांत दाखल केली. माहिती अधिकाऱ्याने कार्यवाहीदरम्यान तिच्या तक्रारीची एक प्रत आयोगाला सादर केली.
