Manoj Jarange | भाऊ मैदानात लढतोय, बहिणीने जेवायला बोलवू नये! अमृता फडणवीसांच्या निमंत्रणाला मनोज जरांगेंचा नकार; पुढे म्हणाले…

मनोज जरांगे पाटील यांच्या उपोषणाचा आज तेरावा दिवस असून, त्यांनी राज्य सरकारवर निशाणा साधला आहे. याचदरम्यान, उपमुख्यमंत्री देवेंद्र फडणवीस यांच्या पत्नी अमृता फडणवीस यांनी मनोज जरांगे पाटलांना ‘वर्षा’ या मुख्यमंत्र्यांच्या अधिकृत निवासस्थानी जेवणासाठी निमंत्रण दिले आहे. त्यांनी जरांगे पाटलांना आपला भाऊ संबोधत, घरी जेवायला येण्याचे आवाहन केले.

या निमंत्रणावर मनोज जरांगे पाटलांनी आपली प्रतिक्रिया दिली आहे. त्यांनी अमृता फडणवीसांचे निमंत्रण नम्रपणे नाकारले. जरांगे पाटील म्हणाले की, सध्या आंदोलन सुरू असताना, बहिणीने जेवणासाठी बोलवणे योग्य नाही. भाऊ मैदानात लढत असताना, बहिणीने त्याला जेवणासाठी बोलू नये. भाऊ संकटात असताना बहिणीने अधिक बारकाईने विचार करावा. सध्याच्या परिस्थितीत जेवणाचे निमंत्रण स्वीकारल्यास हार पत्करावी लागेल, असे त्यांचे म्हणणे आहे.

मनोज जरांगे पाटलांनी स्पष्ट केले की, जर बहिणीने भाऊबीजेला बोलावले, तर आपण साडी-चोळी घेऊन नक्कीच जाऊ आणि जेवायलाही जाऊ. परंतु, सध्या आपण लढाईच्या मैदानात असताना, असे निमंत्रण स्वीकारणार नाही. मनोज जरांगे यांचा हा दिलेला शब्द आहे, असे त्यांनी ठामपणे सांगितले. मराठा आरक्षणाच्या मागणीसाठी त्यांचे उपोषण सुरूच राहणार आहे.