Eknath Shinde : … तर यंदाचा महापौर आपलाच असेल, शिंदेंचे पदाधिकाऱ्यांना काय निर्देश? मनपा निवडणुकीसाठी शिंदे गट सक्रिय

उपमुख्यमंत्री एकनाथ शिंदे यांनी नुकत्याच झालेल्या एका बैठकीत आपल्या पक्षाच्या पदाधिकाऱ्यांना मुंबई महानगरपालिका निवडणुकीसंदर्भात महत्त्वाच्या सूचना दिल्या. आगामी निवडणुकीत मुंबई मनपावर भगवा फडकवण्याचे उद्दिष्ट ठेवून त्यांनी कार्यकर्त्यांना सर्व मतभेद विसरून एकजुटीने काम करण्याचे आवाहन केले.

शिंदे यांनी या बैठकीत स्पष्ट केले की, “मेहनत केली तर यंदाचा महापौर आपलाच असेल.” त्यांनी पदाधिकाऱ्यांना आपापसातील हेवेदावे आणि वादविवाद बाजूला ठेवून कामाला लागण्यास सांगितले. ही निवडणूक ‘महायुती’ म्हणून लढवली जाईल आणि विजय निश्चित असल्याचा विश्वास त्यांनी व्यक्त केला. तसेच, कार्यकर्त्यांनी निवडणूक मतदार यादीवर काम करावे आणि प्रत्येक वॉर्डातील वाढीव मतदारांची माहिती संकलित करावी, अशा सूचनाही एकनाथ शिंदे यांनी यावेळी दिल्या. शिंदे यांच्या या आवाहनामुळे मुंबई मनपा निवडणुकीसाठी महायुती सक्रिय झाल्याचे दिसून येत आहे.