Bhagwan Gad : महंत नामदेव शास्त्रींच्या पाठपुराव्याला यश, केंद्र सरकार भगवान गडाला वनविभागाची 10 एकर जमीन देणार

केंद्र सरकारने बीड जिल्ह्यातील भगवानगडाला वनविभागाची १० एकर जमीन देण्याचा महत्त्वपूर्ण निर्णय घेतला आहे. या निर्णयामुळे गडाचे महंत नामदेव शास्त्री यांच्या दीर्घकाळ चाललेल्या पाठपुराव्याला मोठे यश मिळाले आहे. शास्त्री महाराज यांनी या भूमी वाटपाबद्दल पंतप्रधान नरेंद्र मोदी, राज्याचे मुख्यमंत्री, तसेच केंद्रीय मंत्री भूपेंद्रजी यांचे आभार मानले आहेत. या प्रक्रियेत राज्याचे मुख्यमंत्री देवेंद्र फडणवीस यांनी मोठे सहकार्य केले, असे नमूद करत नामदेव शास्त्री यांनी त्यांच्या कामाचे कौतुक केले आहे.

तसेच, राष्ट्रवादी काँग्रेसचे नेते धनंजय मुंडे यांचेही या कामात मोठे योगदान असल्याचे नामदेव शास्त्रींनी म्हटले आहे. भगवानगडाला मिळालेली ही १० एकर जमीन रुग्णालय, भोजन व्यवस्था, अतिथीगृह आणि कुशल प्रशिक्षण केंद्राच्या उभारणीसाठी वापरली जाईल, ज्यामुळे परिसरातील विकासाला चालना मिळेल. पुढील काळात मुख्यमंत्र्यांच्या अध्यक्षतेखाली भगवानगडावर भूमी हस्तांतरण सोहळा आयोजित केला जाईल, असा विश्वास नामदेव शास्त्री यांनी व्यक्त केला आहे. या सोहळ्याला मुख्यमंत्री देवेंद्र फडणवीस देखील उपस्थित राहण्याची शक्यता आहे.