Chhagan Bhujbal : गंगापूर रोडवरील 50 झाडांची कत्तल भोवली; भुजबळांनी दिले महत्वाचे आदेश

राष्ट्रवादी काँग्रेसचे नेते छगन भुजबळ यांनी नाशिक जिल्ह्यातील विविध समस्यांवर आपले मत व्यक्त केले. रस्त्यांवरील खड्ड्यांचा प्रश्न लवकर मार्गी लागला पाहिजे, असे ते म्हणाले. खड्ड्यांमुळे शहराचे नाव खराब होत असून, त्याचा परिणाम पर्यटनावर होऊ शकतो, अशी चिंता त्यांनी व्यक्त केली. रामकुंड, त्र्यंबकेश्वर, सप्तशृंगी आणि शिर्डीकडे जाणाऱ्या रस्त्यांसह इतर विकासकामे वेळेत आणि चांगल्या दर्जाची व्हावीत, अशी अपेक्षा त्यांनी व्यक्त केली.

त्र्यंबकेश्वर येथे पर्यटकांना झालेल्या मारहाणीच्या घटनेवर भुजबळ यांनी चिंता व्यक्त केली. पर्यटन हा जिल्ह्याच्या अर्थव्यवस्थेचा महत्त्वाचा भाग असून, अशा घटनांमुळे पर्यटकांमध्ये भीती निर्माण होऊ शकते. याबाबत पोलीस अधीक्षक स्वामी साहेबांशी चर्चा केल्याचे त्यांनी सांगितले. पोलिसांकडून सतत गस्त घालणे आणि अशा घटनांवर कठोर कारवाई करणे आवश्यक असल्याचे मत त्यांनी मांडले. केवळ पोलीस ठाण्यात बसून न राहता, पोलिसांनी सक्रियपणे काम करावे, असे आवाहन त्यांनी केले. गंगापूर रोडवर जाहिरात फलकांसाठी ५० झाडे कापल्याच्या घटनेची त्यांनी गंभीर दखल घेतली. महानगरपालिका आयुक्तांशी बोलून संबंधित जाहिरात कंपनीला ब्लॅकलिस्ट करण्याचे आदेश दिल्याचे त्यांनी सांगितले.