Sambhajinagar : PM आवास योजनेतल्या इमारतींना अधिकाऱ्यांची नावं, भानगड नेमकी काय? संभाजीनगर महापालिकेचा अजब फतवा!

छत्रपती संभाजीनगर पालिकेने घेतलेला हा निर्णय सध्या चर्चेचा विषय बनला आहे. मिळालेल्या माहितीनुसार, पालिका आयुक्त जी. श्रीकांत यांनी हा महत्त्वपूर्ण निर्णय घेतला आहे. शहरातील अतिक्रमण हटवण्यात ज्या अधिकाऱ्यांनी महत्त्वपूर्ण भूमिका बजावली, त्यांच्या कार्याचा गौरव म्हणून प्रधानमंत्री आवास योजनेतील इमारतींना त्यांची नावे दिली जाणार आहेत. या निर्णयानुसार, सहाय्यक आयुक्त अशोक गिरी आणि सहाय्यक आयुक्त संजय सुरडकर यांची नावे या प्रकल्पातील टॉवरला दिली जातील. प्रकल्पातील एक टॉवर अशोक नावाने आणि दुसरा टॉवर संजय या नावाने ओळखला जाईल, अशा सूचना देण्यात आल्या आहेत. प्रधानमंत्री आवास योजनेअंतर्गत सुमारे 11,000 गरीब कुटुंबांना परवडणारी घरे उपलब्ध करून देण्याचे उद्दिष्ट आहे. अशा महत्त्वाच्या सरकारी प्रकल्पाला अधिकाऱ्यांची नावे देण्याच्या या निर्णयामुळे प्रशासकीय स्तरावर एक नवा पायंडा पडण्याची शक्यता आहे. या निर्णयामागे अतिक्रमणमुक्त शहर आणि प्रशासकीय अधिकाऱ्यांचे मनोधैर्य वाढवण्याचा उद्देश असल्याचे सांगितले जात आहे.